ОФК сўнгги 4 йилда (2011-2014) Осиё клубларининг рейтинг жадвалини эълон қилди. Унда клубларнинг халқаро мусобақа — Осиё чемпионлар лигаси ва ОФК кубогидаги натижаси инобатга олинган. Қисқа қилиб айтганда, ОФК коэффициентлар жадвалида клубларнинг ўз мамлакатига қанча балл келтиргани ҳақидаги маълумот эълон қилинди (ушбу жадвал асосида мамлакатларга ОЧЛ-2015 учун квоталар тасдиқланди).

Унга кўра, "Бунёдкор" Ўзбекистонга энг кўп очко келтирган клуб сифатида қайд этилган. Умумий ҳисобда эса "қалдирғочлар" сўнгги 4 йилда 78 балл тўплаб, жадвалда 9-ўринни банд этишган. Шунингдек, "Пахтакор" рейтингда 52 (25 балл), "Насаф" 53-ўринни (24 балл) банд этишган.

Жадвални Саудия Арабистонининг "Ал-Ҳилол" жамоаси бошқариб турибди. Кореянинг "Сеул" клуби 2-ўринни эгаллаб турган бўлса, 3-ўрин Саудиянинг яна бир клуби "Ал-Иттиҳод"га тегишли. Кейинги ўринларни "Гуангжоу Эвергранд" (Хитой), "Чонбук Моторс" (Ж.Корея), "Истиқлол" (Эрон), "Фулад" (Эрон), "Аш-Шабоб" (С.Арабистони) клублари эгаллашган.