Саудия Арабистони миллий терма жамоасида бош мураббий ўзгаргани ва жамоа ҳамон Осиё кубогига тайёргарликни бошламагани кўпчиликни ҳайрон қолдирмоқда. Саудиялик спорт журналисти Волид ал-Фараж ўзининг Твиттердаги саҳифаси орқали мамлакат футболи раҳбарларини кескин танқид қилиб чиқди.
"Мухлислар футбол федерацияси раҳбариятидан норози. Козмин Австралияга йўл олишдан 3 кун аввал машғулотни бошламоқчи. Ўзбекистон, Хитой ва КХДР терма жамоалари йиғинлар ташкил қилаётган ва ўртоқлик учрашувларини ташкил этаётган пайтда, бизнинг футболчилар Валиаҳд шаҳзода кубоги билан банд ҳамда Олариу Козмин Саудия Арабистони терма жамоаси футболчиларининг исмини билмайди", - дейди журналист.
23-24 декабрь кунлари Саудияда Валиаҳд шаҳзода кубоги мусобақасининг чорак финал ўйинлари ўтказилади. Саудия Арабистони футбол федерацияси ушбу ўйинларни кейинроқ муддатга қолдириш ҳақидаги Олириу Козминнинг илтимосини рад қилган. Натижада бош мураббий агар Осиё кубогида ижобий натижа қайд этилмаса, масъулиятни ўз зиммасига олмаслигини таъкидлади.
