Шимолий Корея миллий терма жамоаси етакчиси Чон Тэ Се Осиё кубогида иштирок этмайдиган бўлди. Бу ҳақда Хитойнинг "Сина" ахборот агентлиги хабар тарқатди. Манбада таъкидланишича, бу сиёсий сабаб билан боғлиқ.
Ҳужумчи аслида Япониянинг Нагоя шаҳрида туғилган. Аммо унинг ота-онаси — жанубий кореялик. Шунга қарамай, Чон Тэ Се 2006 йилда Япония ва Жанубий Кореянинг таклифини рад этиб, КХДР терма жамоаси таклифини қабул қилди. Натижада у ўз терма жамоаси билан бирга ЖАР-2010да иштирок этишга муваффақ бўлди. Бразилияга қарши ўйин олдидан Шимолий Корея мадҳияси янграганида футболчи кўзёшларини тийиб тура олмагани кўпчиликнинг ёдида қолган.
2013 йилда Чон Тэ Се Жанубий Кореянинг "Сувон" жамоасига таклиф этилди. Ҳужумчи легионер ҳисобланмаслиги учун қўшни мамлакат фуқаролигини қабул қилди. Айнан шу ҳолат туфайли унга КХДР терма жамоасининг эшиклари батамом ёпилди. Ҳозирда шимолликлар ўз мамлакатларида Осиё кубогига тайёргарлик кўришмоқда, аммо Чон Тэ Се йиғинга чақирилмаган.
"Сина" тарқатган хабарга кўра, Чон Тэ Се Инчеонда бўлиб ўтган Осиё Ўйинларига ҳам таклиф этилмаган.
"Мен шу пайтгача КХДР терма жамоасида ўйнаб келдим. Уларнинг қарорини тушунаман. Сиёсат барчасини йўққа чиқарди. Бу ачинарли", - дейди Чон Тэ Се.
Ўзбекистон терма жамоаси Осиё кубогидаги илк ўйинни 10 январь куни КХДРга қарши ўтказади.
