Мексиканинг "Керетаро" клуби президенти Хоакин Бельтран жамоа Роналдиньони ўз сафида олиб қолишини айтиб ўтди.
Жамоа президенти бразилиялик футболчи яқинда жамоа мураббийлар штаби ва раҳбарияти билан гаплашганини таъкидлаган. Маълумотларга кўра Роналдиньо ўзининг шахсий ишларини битириб олиш мақсадида клуб раҳбариятидан рухсат сўраган. Бразилиялик футболчи январь ойи бошида "Керетаро" сафига келиб қўшилади ва машғулотларга киришади. Аммо футболчи Мексика чемпионатининг 1-турида "Пумас"га қарши учрашувни ўтказиб юборади.
"Роналдиньо яқинда бу ерга ташриф буюриб, мураббий ва футболчилар билан суҳбатлашди. Жамоа уни тўлиқ қўллаб-қувватлайди", - дейди Бельтран.
Эслатиб ўтамиз, аввалроқ "Керетаро" президенти Роналдиньонинг машғулотларни бесабаб ўтказиб юбораётганидан норози экани ва унга нисбатан ультиматум қўлланиши борасида фикр билдирган эди.
