Украинанинг Тернопол вилояти футбол федерацияси бошлиғи Владимир Мариновский маълумот бериб, Украина Биринчи лигаси вакиллари — «Нива» ва «Тернополь» ўртасидаги ўйинни (2:2) УЕФА шубҳа остига олганини таъкидлади.

«Украина футбол федерацияси вице-президенти ҳамда Этика ва Ҳалол ўйин қўмитаси раиси сифатида менга УЕФАдан мурожаат келиб тушди. Унга кўра, УЕФА 16 ноябрь куни бўлиб ўтган "Нива" — ФК "Тернополь" (2:2) ўйини келишилган бўлганига шубҳа билдирмоқда.

Асос сифатида Британия букмекерлик идораларига Тернополдан тикилган 5 хил ставка инобатга олинмоқда. "Ўйинчилар" барча бешта ҳолатда ўйиннинг боришини олдиндан аниқ билишган. Натижада битта ставкада энг катта ютуқ қўлга киритилган — 10 минг фунт. Қолган 4та ставкада жами 13 минг доллар ютилган.

Ушбу ҳодиса жуда ёқимсиз ва шармандали. Ҳар иккала жамоа аъзолари таътилдан қайтишини кутамиз ва жиддий текширув ўтказамиз», — дейди Мариновский.