Осиё кубоги-2015 яқинлашган сари турли сайт ва нашрларда иштирокчи терма жамоалар тўғрисида турли мақолалар чоп этиб борилиши табиий ҳол. Eurosport.yahoo.com сайти Ўзбекистон терма жамоаси ҳақида мақола эълон қилди. Уни эътиборингизга ҳавола этамиз.
"Ўзбекистон миллий терма жамоаси ЖЧнинг финал босқичига чиқа олмаётган бўлса-да, жамоанинг қитъа чемпионатида натижалари барқарор кўриниш олмоқда. "Оқ бўрилар" Австралиядаги мусобақада ўзининг кучли жамоа эканини исботлашга уринади.
Ўзбекистон терма жамоасининг Осиё кубогидаги иштирокига назар ташлайдиган бўлса, жамоа мусобақадан мусобақага ўз натижаларини яхшилаб борганига гувоҳ бўламиз. Терма жамоа илк марта 1996 йили қитъа чемпионатида иштирок этган пайтда "сирли тулпор" эди. Аммо 4 йил аввалги мусобақадан кейин бу жамоа турнир фаворитларидан бири сифатида эътироф этилмоқда.
Иттифоқ парчаланиб кетганидан кейин Ўзбекистон ўзининг илк халқаро учрашувини 1992 йилда ўтказган. Шундан кейин улар қитъада ўз ўйин фалсафаси ва тактикасига эга бўлган кучли жамоа сифатида шаклланиб боришди. Ўзбекистон 2007 йилги Осиё кубогида чорак финалга чиққан бўлса, 2011 йилда ярим финалгача етиб борди. Ушбу натижалар жамоанинг Австралияда ҳам ўзига бўлган кучини ошишига хизмат қилади.
Ўзбекистон ФИФА рейтингида 74-ўринни, Осиё жамоалари орасида эса 4-ўринни банд этиб турибди. Улар "В" гуруҳида Саудия Арабистони, Хитой ва КХДР билан баҳс олиб боришади. Австралия Қатардаги мусобақанинг ярим финалида Ўзбекистонни 6:0 ҳисобида ютганига қарамай ва Жанубий Корея ФИФА рейтингида Ўзбекистонда 5 ўрин юқорида жойлашганига қарамай, улар Ўзбекистондан ўта олишларини хотиржамлик билан айта олишмайди.
Барчага яхши таниш бўлган Миржалол Қосимов Ўзбекистон билан бирга ўз иқтидорини намойиш қилиш учун яна бир имкониятга эга. Шунингдек, Осиёнинг икки карра энг яхши футболчиси, жамоа сардори Сервер Жепаров яна бир марта ўзини кўрсатишга ҳаракат қилади. 32 ёшли футболчи шу пайтгача терма жамоа сафида 100дан ортиқ ўйинларда иштирок этган. Катта эҳтимол билан у ҳужум ортида ўйнаса керак. Аммо у универсал футболчи ҳисобланади ва ҳар иккала қанотдан рақиб дарвозасига бирдек хавф сола олади.
Максим Шацких ва Улуғбек Бақоев терма жамоадаги фаолиятларини якунлашганидан кейин Одил Аҳмедов ва Сардор Рашидов уларнинг йўқлигини билинтирмасликка ҳаракат қилишади.
Ўзбекистон ўртоқлик ўйинлари орқали юқори формага чиқишга ҳаракат қилди. Жамоа ўзининг Осиё кубогидаги илк ўйинини 10 январь куни Сиднейда Шимолий Кореяга қарши ўтказади. Дунёнинг етакчи 5та букмекерлик идоралари ушбу ўйинда Ўзбекистонни фаворит сифатида эътироф этишмоқда".
