Ҳаммага маълумки, Ғузорнинг “Шўртан” жамоаси бу йилдан яна Олий лигага қайтди. Жамоа 3 январдан Тошкент шаҳрида мавсумга тайёргарликларнинг иккинчи босқичини бошлади.
“Шўртан” ПФК расмий сайти орқали берилган хабарлардан шуни англаш мумкинки, жамоа янги мавсумга жиддий тайёргарлик кўрмоқда. Шунингдек, ўз сафига тажрибали ўйинчиларни ҳам йиғишни бошлаб юборди.
Ўтган йилда футболимизда кўплаб тилга олинган футболчиларни маоши ва мукофот пуллари, деган муаммоларни “Шўртан” клуби раҳбарияти аллақачон ечиб қўйди. Улар олдида энди фақат янги ғоя ва режалар.
Эшитишимизча, “Шўртан” клуби бу йилдан ПФЛ томонидан рухсат берилган легионерлар лимитидан ҳам тўлиқ фойдаланишга қарор қилган. Демак, “оқ бўрилар” сафида учта европалик ва бир осиёлик легионер футболчилар пайдо бўлиш эҳтимоли бор.
“Шўртан” бу йил Ўзбекистон миллий чемпионатида ва Ўзбекистон Кубоги мусобақаларида иштирок этади. Афтидан клуб ўз олдига жиддий мақсадларни қўйиши ҳозирдан кўрина бошлади.
Хўш, ички чемпионатда қатнашишдан ташқари Осиё қитъасининг клублар ўртасидаги энг нуфузли футбол мусобақасида қатнашиш ҳуқуқини қўлга киритган, вилоятнинг бош жамоаси – “Насаф”да-чи?..
Тан олиш керак ҳозирги пайтда воҳамиз футбол мухлислари “Насаф” жамоаси ҳақидаги янгиликларни кутиб яшашмоқда. Улар “Насаф”ни ОЧЛда муваффақиятли иштирокидан умид қилишяпти. Афсуски, ҳозирча жамоада кеттилар бор-у, келдилар йўқ. Аслида бу “Насаф”га хос одат, футболчи жамоада шакллланади, кўзга ташланади ва кейин эркин қушдек, “учирма” қилинади.
Балки хавотирларимиз ўринсиздир, тан оламиз ўзимиз ҳам шуни жуда ҳоҳлаймиз. Ажаб эмас, яқин кунларда жамоани кучайтириш ҳақидаги янгиликларни эшитиб қолсак.
“Шўртан” футбол клубига эса янги мавсумда улкан зафарлар тилаб қоламиз.
