Аввал хабар берганимиздек, “Металлург” футболчилари Чирчиқ шаҳрида ўқув-машғулот йиғинини давом эттиришмоқда, дея хабар бермоқда клуб расмий сайти.
Футболчилар ҳар куни икки маҳал чигилёзди машқларидан ташқари тўп билан ишлаш борасидаги кўникмаларини ошириб боришяпти. Бунда таркибнинг иккига бўлинган ҳолда ўтказаётган ўйинлари қўл келяпти.
Кутилганидек, жамоа тўпурари Шаҳзодбек Нурматовнинг “Ал Риффа” билан шартнома имзолаши эҳтимоли юқори. Айнан шу мақсадда у Баҳрайнга учиб кетди. Жамоа плеймейкерларидан бири Суннатилла Мамадалиев эса Эрон клубида кўрикда бўлиб қайтганди. Аммо у легионерга айланмайдиганга ўхшайди. Мамадалиев айни пайтда Тошкент вилоятининг бошқа бир жамоаси “Олмалиқ” машғулотларида иштирок этаяпти.
Энг катта ўзгаришлар “Металлург”нинг ёшлар таркибида бўлиши кутилмоқда. Айни пайтда Февзи Давлетов ҳамда Одил Исабоевлар қўл остида Бекободда 35-40 нафар футболчилар машғулотларда қатнашишяпти. Кимларнинг таркибда олиб қолинишини вақт кўрсатади. Кейинги ҳафтадан ёшлар таркиби ҳам кўрик ўйинларини ўтказишга киришади. Дастлабки ўйин Олмалиқда маҳаллий клубнинг ёшларига қарши 16 январда бўлиши аниқланди. Асосий таркиб ва ёшларнинг бошқа учрашувлари ҳақида кейинроқ маълумот берамиз.
