Ўзбекистон терма жамоаси ярим ҳимоячи Азиз Ҳайдаров БААнинг "The National" веб-сайтига интервью берди.

"Хафа бўлманг, мен Жанубий Кореяга ташнаман. Жамоамиз кореяликларни кутяпти. Биз уларга қарши ўйнашни истаймиз", - дея ўз сўзларини бошлайди Азиз.

Ўзбекистон терма жамоаси Осиё кубоги-2011да 3-ўрин баҳсда кореяликларга ютқазган бўлса, ЖЧ-2014 саралаш босқичида айнан Кореядан учралган мағлубият учун Мундиалга чиқа олмаганди.

"Сўнгги ЖЧ учун саралаш босқичи қийин кечганди. Бизнинг жамоа 14 очко тўплаб, ЖЧ йўлланмасини қўлга кирита олмаганди. Фақат тўплар фарқига кўра Кореядан ортда қолгандик. Жудаям ҳафсаламиз пир бўлганди", - дейди Ҳайдаров.

"Мен учун терма жамоа муҳим. "Шабаб" — бу менинг уйим, менинг оилам, у ерда мен учун барча нарса бор. Терма жамоа эса менинг юрагим. Мен Ўзбекистонда туғилганман, киндик қоним шу ерда тўкилган. Бунинг фарқи катта", - дейди "Аш-Шабоб" футболчиси.

Ўзбекистон терма жамоаси Россияда ўтадиган ЖЧ-2018га чиқишга ҳаракат қилиб кўради.

"Ҳозирги кунда ёш ўйинчиларнинг ўсишига ёрдам бериш муҳим аҳамиятга эга. Мазкур Осиё кубоги ЖЧ-2018 саралаш босқичи учун тайёргарлик вазифасини ўтайди. У пайтга бериб менинг ҳам ёшим ўтиб қолса керак. Таркибдаги кўпгина футболчилар қариб қолишади.

Ўзбекистон мустақил бўлганига энди 24 йил бўлмоқда. Ҳар сафар ЖЧга боришни истаймиз, аммо бизга вақт керак. Кўплаб терма жамоалар ЖЧга чиқиш учун қанча вақт сарфлашган? Биз ҳали ёш мамлакатмиз. Иншооллоҳ, биз бу ишни амалга оширамиз".

"Аввалги Осиё кубоги ярим финалида Австралияга 0:6 ҳисобида ютқазиб қўйгандик. Ўша ўйинда майдонга тушганлардан 6 нафари Австралияга келган. Бу жамоага қарши майдонга тушсак, бу сафар ғалаба қозонишни истаймиз. Ўзбекистон терма жамоаси жанг қилади, жангсиз ғалаба қозониб бўлмайди", - дейди Азиз Ҳайдаров.