Эртадан Осиё кубоги мусобақасига старт берилади. Эрматов бошқариб борадиган Австралия ва Кувайт ўртасидаги очилиш ўйини Тошкент вақти билан 14:00да бошланади. Терма жамоамизнинг илк ўйини эса 10 январь куни соат 12:00да бошланади.
Табиийки, футбол мухлислари ўйинларни турли манбалар орқали кузатиб боришга ҳаракат қилишади. Бу борада футболга ихтисослашган веб-сайтлар қамишдан бел боғлаб аллақачон ишни бошлаб юборишган.
Ўйинларни телевизор орқали томоша қилишни барча истайди. ОФК ҳамма иштирокчи давлатларнинг биттадан телеканалига ўйинларни трансляция қилиш ҳуқуқини бепул тақдим этган. Ўзбекистон миллий телерадиокомпаниясининг "Спорт" телеканали барча ўйинларни жонли эфирда трансляция қилиб боради. Гуруҳнинг 3-тур ўйинлари параллел равишда ўтказилгани боис, иккинчи ўйин ёзиб олинган ҳолда намойиш этилади.
Бундан ташқари, "Евроспорт-2" телеканали ҳам Осиё кубогининг аксарият ўйинларини жонли трансляция қилади.
Шундай экан, бир ой давомида кундалик ТВ-дастур энг муҳим манбага айланади. Бизда эса бундай имконият бор. "Спорт" ва "Евроспорт-2" телеканалларидан ташқари спортга ихтисослашган бошқа каналлар ва ЎзМТРКнинг марказий каналлари теледастурларини сайтимизнинг ТВ-ДАСТУР бўлими орқали танишиб боришингиз мумкин.
