Жанубий Кореянинг «Yonhap News» ахборот агентлиги эртага бўладиган Ўзбекистон - КХДР терма жамоалари олдидан ўтказилган матбуот анжуманидан хабар берди. КХДРга яқиндагина бош мураббий этиб тайинланган Чо Тонг Соб Сиднейдаги Олимпик Парк ўйингоҳида ўтказилган матбуот анжуманини:
«Ҳар қандай жамоанинг мақсади ғалаба бўлгани каби, бизнинг ҳам бош ниятимиз ушбу турнирда ғолиб бўлишдир. Биз узоқ вақт тайёргарлик кўрдик. Шунинг учун бор кучимиз ва маҳоратимизни кўрсатсак ҳар қандай рақибни мағлуб эта оламиз», дея бошлади. «Бизни ғолибликка қадар жуда қийин йўл кутиб турибди. Лекин биз ғолибликка ташнамиз ва бунга эришишга ўзимизда ишонч бор».
Жанубий кореялик мухбирларнинг чорак финалда икки Корея дербиси бўлиб қолиши мумкинлиги ҳақидаги саволига шимолликлар бош мураббийи қуйидагича жавоб қайтарди:
«Гуруҳимизда савияси юқори жамоалар йиғилган. Ҳар бир ўйин қийин кечади деб ўйлайман. Ҳозирча бор фикримиз гуруҳ босқичини муваффақиятли якунлашда. Кейинги босқичга чиқсак, шогирдларимнинг руҳияти ҳам кўтарилади ва чорак финалдаги рақибнинг фарқи бўлмай қолади. Биз нафақат Жанубий Корея, балки бошқа рақиблардан ҳам қўрқмаймиз».
Жанубий Кореялик журналистлар шунингдек Кей-лигада «Сувон» таркибида 2014 йилги чемпионат кумуш медалига сазовор бўлган хужумчи Чонг Те Сенинг нима учун таркибдан четда қолганлигига қизиқишди.
«Чонг Те Се шубҳасиз яхши футболчи. Аммо у жароҳатлари боис кўп машғулотлар ўтказа олмади ва жисмоний ҳолати ҳам яхши эмасди. Шу ва бошқа жиҳатларини эътиборга олиб уни Осиё Кубогига олиб келмасликка қарор қилдик», деди Чо Тонг Соб.
Дастлабки рақиб - Ўзбекистон терма жамоаси ҳақида эса КХДР бош мураббийи шундай деди:
«Жуда ҳам юқори даражали жамоа деб ўйлайман. Биз ДВД орқали уларнинг ўйинларини ҳар томонлама ўргандик. Кучли томонлари бўлгани каби заиф нуқталарини ҳам илғай олдик. Эртага бизни қийин ўйин кутяпти. Рақобатга тўла ўйин бўлади. Биз қўл қовуштириб ўтирмаймиз. Эртага узоқ тайёргарлигимиз мевасини кўрамиз. Менимча, яхши натижага эришамиз».
Отабек Йўлдошев
Жанубий Корея, Сеул
