Тан олиш керакки, бугунги ўйинда ўзига хос бир маромда ўйнаган футболчиларимиздан бири Азизбек Ҳайдаров бўлди. Қуйида бу тажрибали таянч ярим ҳимоячимизнинг ўйин хусусидаги фикрларини "микс зона"да ёзиб олдик.

— Бугунги ўйин биз учун ҳам жуда оғир кечди. Айниқса, бундай об-ҳавода ўзимизнинг асл ўйинимизни кўрсата олмадик. Негаки, бирор марта кучли ёмғир остида машғулот олиб бормагандик (кулади). Шунингдек, рақиб жамоа ҳам биз кутгандан кўра мазмунлироқ ўйин кўратишга эришди. Аммо, биз ҳар жабҳада улардан устун эканигимиз яққол билиниб турди ва бу ҳисобда ҳам ўз аксини топди. Бироқ, ўйиндаги ҳисоб йирикроқ бўлиши лозим. Энг катта камчилигимиз голли вазиятлардан оқилона фойдалана олмаслигимизда бўлди. Ўйлайманки, кейинги ўйинларда бу каби ҳолатлар голга айланади...

— Сизнингча, кореяликлар ўз даражаларида ўйнай олишдими?
— Биз ҳар доим бу терма билан ўйнаганимизда қийинчиликга дуч келганмиз. Зотан, улар ҳимоявий футбол намойиш этиб келишаётир. Бугун ҳам худди шундай бўлди, дейолмайман. Улар вақти-вақти билан ҳужумкор футбол кўрсатига ҳам киришишди. Таркиблари деярли ёшартирилган ва янгиланган бу жамоада ҳали имкониятлар етарли. Агарда улар кейинги ўйинларда ғалаба қозонишса, бемалол плей-оффга чиқишлари мумкин. Яна ким билади, дейсиз..

— Гуруҳдаги қолган рақибларимиз хусусида нималар дея оласиз?
— Яхши биласиз ҳозирда улар бир-бирларига қарши майдонда тўп суришмоқда. Нима бўлган тақдирда ҳам 2-турда ғалаба қозонишимиз керак, чунки мазкур ютуқдан сўнг биз кейинги босқич масаласини 100 фоизга ҳал қилган бўламиз. Шундан сўнг бемалол, чорак финал ҳақида ўйлашимиз мумкин. Ҳаммаси ўзимизга боғлиқ. Агар бир ҳар бир ўйинда максимал тарзда ҳаракат қиладиган бўлсак, Худо хоҳласа кўзган мақсадимизга эришамиз.

А.Абдуҳамитов, Сидней

Ушбу суҳбатни давомини "ИнтерФУТБОЛ" газетасини 14 январь, сешанба сонида ўқийсиз.