Бугун «А» гуруҳида Кувайт терма жамоаси Жанубий Кореяга 0:1 ҳисобида мағлуб бўлиб, чорак финалдан батамом умидини узди. Ўйиндан кейинги матбуот анжуманида кувайтликларнинг тунислик бош мураббийи Набил Малул қуйидагича фикр билдирди:

«Бугун биз ғалаба қозониш учун уриндик. Чунки бизда орқага йўл йўқ эди. Мен ушбу жамоани уч ҳафта аввал қабул қилиб олганман. Бу ўз таъсирини кўрсатяпти. Бугун шогирдларим иккинчи бўлимда яхшироқ ҳаракат қилишди. Жанубий Корея – Уммон ўйинида корейслардан Сон Хеунг Мин жуда хавфли ўйинчи сифатида таассурот қолдирганди. Бугун у майдонга туша олмаганлиги туфайли корейсларнинг ҳужум чизиғи бўшашди».

«Австралия ва Жанубий Корея термаларидан қайси бири кучлироқ деб ўйлайсиз», деган саволга Кувайт бош мураббийи: «Шундай савол берилишини билгандим. Бир нарсани айтишни истардим: бугун майдонда ҳаракат қилган Жанубий Корея энг кучли таркибда эмасди».

Эслатиб ўтамиз, Жанубий Кореянинг «Байер Леверкузен»да тўп сурадиган футболчиси Сон Хеунг Мин бугунги ўйинни шамоллаб қолганлиги туфайли ўтказиб юборди.

Отабек Йўлдошев
Жанубий Корея, Сеул