Айни пайтда жароҳатини даволаётган, жамоамиз вице-сардори, кечаги ўйинда етакчиликни қўлга олган Одил Аҳмедов учрашувни ўзига хос финалга қиёслади:
— Бу ўйин биз учун финалдек эди. Жамоамиз бир тану бир жон бўлиб ҳаракатланди ва кўзланган мақсадга етдик.
— Бугунги таркиб хусусида фикрингиз...
— Терма жамоага 23 нафар футболчи таклиф этилган. Барчамиз тенг кучли саналамиз ва мақсадимиз ҳам бир. Мана, бугун асосан ёш футболчилар асосий таркибда майдонга тушишди. Улар ишончни оқлашди. Жамшид Искандеров, Сардор Рашидов каби йигитлар бизнинг келажагимиз ҳисобланишади.
— Ҳакамликдан кўпчилик норози бўлди...
— Қўпол қилиб айтсам, ҳакам бизнинг ғалаба қозонишимизни истамади. Мана, вазиятларни бошқатдан кўриб чиқдик, ҳеч қандай пенальти йўқ экан. Шундай бўлсада, Худога шукр, катта иштиёқ туфайли чорак финалга йўл олдик.
— Ўйин давомида жароҳатлангандек кўриндингиз, ҳозирда ҳолатингиз яхшими?
— Ўйин аввалида эски жароҳат бироз безовта қилди, кейинроқ шу ҳол такрорланди. Аммо қўрқинчли эмас, келгуси ўйингача муолажа олиб, сафга қайтаман...
Ж.Корея термаси Осиёнинг энг кучли жамоаларидан бири ҳисоблансада, у билан бемалол ўйнаш мумкин. Фақат, бугунгидек шижоат кўрсатсак, бас.
