Италия прокуратураси аргентиналик машҳур футболчи Диего Марадонага нисбатан суд жараёни бошлашни талаб қилмоқда.
Марадона Италиянинг қарзларни йиғиш агентлиги - "Экуиталия"нинг собиқ президенти Аттилио Беферани ҳақорат ва туҳмат қилишда айбланмоқда.
Футбол афсонаси 2012 йилда ўзини агентлик томонидан уюштирилган "таъқиблар қурбони" деб атаган эди.
Ўтган асрнинг 80-йилларида "Наполи"да тўп сурган Марадона, ҳозиргача маҳаллий солиқ органлари билан зиддиятда бўлиб келмоқда. Солиқ органлари Марадонадан тўланмаган солиқлар учун 40 миллион евро ундирмоқчилар. 2013 йилда Марадонаан барча молиявий иддаолар олиб ташлангани ҳақида хабарлар тарқалган эди, аммо "Экуиталия" агентлиги буни инкор қилган эди.
Собиқ футболчи ўз вақтида Италия давлатини судга бермоқчи бўлган. Чунки Марадонанинг Италияга ҳар ташрифи унинг қимматбаҳо буюмларининг конфискация қилинишига олиб келмоқда: бир марта бриллиант сирға, бошқ сафар қимматбаҳо соат. Бу буюмлар қарзларни қоплаш мақсадида кимошди савдоларда сотилган.
