Криштиану Роналду Мадрид кўчаларини кекса саёҳатчи қиёфасига кириб, ўзини танитмаган ҳолда кезиб чиқди. У йўлида бир болакай учраганида, ўзининг асл қиёфасига қайтди ва болага футбол тўпи совға қилди. Бу ҳақда Bleatcher Report'га асосланиб Kun.uz хабар қилмоқда.
Шунингдек, бу жараённинг бир парчасини акс эттирувчи лавҳа You Tube сайтида тарқалган.
Видеолавҳа орқали португалиялик футболчи бошидан улама сочини ва лунжидан ясама мўйловини ечиб, сафар сумкасидан ўз дастхати туширилган футбол тўпини олиб болакайга тутқазиши ҳамда уни қучоқлаб ўпиб қўяётганини кўриш мумкин.
Саёҳат давомида уни яқин масофада тан соқчиси ҳам кузатиб борган.
Гувоҳларнинг айтишича, Роналду бу соч ва мўйловлари, устидаги одми кийимлари орқали “Ақлсиз жангчи” комедиясида Жорж Клуни томонидан ижро этилган Лин Кессиди кинообразини эслатиб юборган.
