Бугун пойтахтимиздаги “Чилонзор” стадионида янги мавсумга ҳозирлик кўраётган Тошкент вилояти жамоалари – “Металлург” ва “Олмалиқ” кўрик назорат учрашувида ўз кучларини синаб кўришди. Қизиқарли курашлар остида ўтган ўйинда дуранг натижа қайд этилди – 0:0.
Ўйин давомида тўпни назорат қилиш борасида Игорь Шквирин жамоаси устунликка эга бўлди. Аммо хавфли вазиятларни яратиш борасида Рустам Мирсодиқов шогирдлари яхшироқ кўрсаткичга эга бўлишди. Бекободликлар вилоят дербисида “Олмалиқ” жамоаси дарвозасига камида тўртта гол киритиш имкониятини қўлдан бой берди. Биринчи таймда Зиёвуддинов – Вагапов – Абдуллаев комбинациясидан сўнг Зоҳид дарвозабон билан яккама якка ҳолатдан фойдалана олмади. Иккинчи таймда ҳам Никита Шквирин Шаҳзодбек Нурматов билан худди шундай вазиятда жамоасини муқарра голдан сақлаб қолди. Яна иккита имконият Шаҳзодда бўлганди. Ҳар иккала ҳолатда Нурматов жамоадошлари узатиб берган тўпни дарвозага тўғрилаб қўйишда хатога йўл қўйди.
Жамоалар учрашувни қуйидаги таркибда ўтказишди:
“Металлург” Раҳимжон Раҳмонбердиев, Ҳикмат Ҳошимов, Мирғиёс Сулаймонов, Дониёр Одилов, Даврон Каримқулов, Дилмурод Каримов (Суннат Эрматов), Алишер Зиёвуддинов, Руслан Вагапов, Муроджон Тошматов, Шуҳрат Йўлдошев (Миртўра Акбаров), Зоҳид Абдуллаев (Шаҳзодбек Нурматов).
“Олмалиқ”: Н.Шквирин, А.Ҳожиакбаров (Д.Исмоилов), С.Қуттибоев, И.Иномов (А.Тошпўлатов), Е.Гоголь, С.Мамадалиев (Н.Павленко), Ғ.Ўринов, С.Жўраев (А.Исроилов), З.Пиримов, С.Шихов (И.Исоқжонов), Н.Йованович (М.Исаев).
“Металлург” кейинги назорат учрашувларини “Машъал” (3 февраль) ва “Бухоро” (7 февраль) жамоаларига қарши ўтказади.
