Каталониянинг "Барселона" клуби бош мураббийи Луис Энрике "Ювентус" ярим ҳимоячиси Поль Погбани ўз жамоасига олиб келиш ниятида.
Хабарларга кўра, ФИФА томонидан 2 йиллик муддатга трансфер тақиқига учраганига қарамай, "Барселона" ёзда бир қатор футболчилар билан шартнома имзолашни режалаштирган.
"Барселона"нинг асосий нишони эса "Ювентус" аъзоси Поль Погба бўлиб турибди. Аммо, франциялик футболчига Мадриднинг "Реал" клуби ҳам қизиқиш билдираётгани ва уни қўлга киритиш учун "Барселона"дан ҳам яхширок имкониятга эга эканликлари борасида каталонияликлар хабардор. Шунинг учун ҳам улар захира варианти сифатида "Реал" футболчиси Искони ўз сафига қўшиб олишлари мумкин.
Эслатиб ўтамиз, "Барселона" ўтган йил ёз ойида Погба борасида "Ювентус" билан музокаралар ўтказган, аммо "Ювентус" футболчи борасида рад жавобини берган эди.
Маълумот ўрнида, "Барселона" клуби тақиққа қарамай футболчилар билан шартнома имзолашлари мумкин, фақатгина ушбу футболчилар "Барселона" сафида 2016 йилгача майдонга туша олмайдилар.