Москванинг ЦСКА жамоасида 2004-2013 йиллар мобайнида тўп сургач, 2013 йил ёзида Хитойнинг “Шандунь Лунен” жамоаси сафига бориб қўшилган бразилиялик футболчи Вагнер Лав бу жамоада легионер футболчилар сони ошиб кетгани учун, “легионерлар лимити” қоидасига кўра, жамоани тарк этган. Бу ҳақда футболчининг ўзи “фейсбук”даги саҳифаси орқали маълум қилган.
Хитой футбол федерацияси жорий этган қоидаларга кўра, лигадаги жамоалар 5 нафардан легионер ўйнатиш ҳуқуқига эга. Қишки трансферлар якунида “Шандунь Лунен” жамоаси таркибига Диего Тарделли келиб қўшилгач, Вагнерга бу жамоада жой топилмай қолган.
Маълумот учун, 30 ёшли ушбу футболчи ЦСКА сафида 3 марта Россия чемпионлигини ва бир мартадан кумуш ҳамда бронза медалларни қўлга киритган. Шунингдек, у “армиячилар” билан 6 марта Россия Кубогини ва бир марта УЕФА Кубогини боши узра кўтарган. Хитойда эса унинг жамоаси ўтган мавсумда кумуш медаллар билан кифояланди.
Вагнер Лав Бразилия терма жамоасида ҳам 2004-2007 йиллар оралиғида 21 марта халқаро ўйинларда майдонга тушган.
