Бугун Жанубий Корея олимпия терма жамоасига янги бош мураббий этиб тайинланган Шин Тэ Йонг иштирокида матбуот анжумани бўлиб ўтди.

Жанубий Корея олимпия терма жамоасига 2014 йил октябрида бош мураббий бўлиб, Таиландда ўтган Қирол Кубогига ҳам корейсларни мураббий сифатида бошлаб борган Ли Кванг Жонг оқ қон касаллигига чалинганлиги туфайли Таиланддан эртароқ қайтишга мажбур бўлганди. Эслатиб ўтамиз, айнан Ли Кванг Жонг бош мураббийлик қилган Жанубий Корея терма жамоаси Инчеонда ўтган Осиё ўйинлари футбол мусобақасида олтин медалларга сазовор бўлганди. Жиддий касалликка учраганлиги маълум бўлгач, энди Ли Кванг Жонг ўрнига Шин Тэ Йонг корейсларни 2016 йилги Олимпиада саралаш босқcиҳига тайёрлайди.

Бугунги матбуот анжуманида Шин Тэ Йонг қуйидагиларни маълум қилди: «2016 йил январида Олимпиада саралаш ўйинлари бошланади. Ўтган Олимпиада саралашларидан фарқли равишда бу сафаргиси дастлабки саралашлардан ўтган 16 жамоа иштирокида Қатарда турнир тарзида ўтади. Чорак финалда мағлуб бўладиган жамоалар уйига равона бўлишини ҳисобга олсак, жудаям қийин бўлади. Менинг тахминим бўйича, даъвогарлар ўша-ўша: Шарқий минтақадан биз билан бирга Япония, КХДР ва Хитой, Ғарбий минтақадан эса Ироқ, БАА ва Эрон. Буёқдан Ўзбекистон ҳам бор. Қирол Кубогида ўзбеклар Таиланд билан ўйинда жуда яхши ўйнашди. Бундан ташқари саралаш турнири Қатарда ўтади, демакки, мезбонларни ҳам ҳисобдан чиқармаслик керак».

Отабек Йўлдошев
Жанубий Корея, Сеул