Баландликка лангарчўп билан сакраш бўйича кўп маротаба жаҳон рекордчиси Елена Исинбаева ЦСКА клубига қайтишини ҳамда машғулотларни бошлашини маълум қилди, деб хабар берди «Газета.Ru» мухбири.

“Мен “ЦСКА”га қайтишимдан хурсандман. Мен учун “ЦСКА”га қайтиш, катта спортга қайтиш демакдир, бизнинг клуб билан истакларимиз мос тушмоқда. Мени катта спортга қайтишимга нима ундаганини айтиб бермоқчиман. Қизим уч ойлик бўлганда, мен 2012 йилги Лондон Олимпиадасида бронза медаль олганим учун ўзимдан кониқмаётганим туфайли спортга қайтишим ОАВларда муҳокама қилина бошланди.

Мана, мен тайёргарликни бошлашга қарор қиладиган лаҳза етиб келди. Ҳозирда ҳафтасига уч марта машғулот ўтказяпман. Мураббий менга машғулотлар режасини тузиб берган. Бу режа бўйича сентябргача шуғулланаман. 2015 йилнинг охирида мен Риода олтин медаль учун курашишга тайёр ёки тайёр эмаслигим ҳақида аниқ бир қароримни айтишим мумкин бўлади.

Қизим Ева ҳозир етти ойлик бўлди. Менда бўш вақт пайдо бўлди ва мен уни керакли жойга йўналтирмоқчиман. Оилам, турмуш ўртоғим, мураббий менинг спортга қайтиш истагимни қўллаб-қувватлашди. Агар менга жароҳат халақит берса, унда бу уринишларим бефойда бўлади. Ёки мен олтин медаль учун тайёргарлик кўраман, ёки агар буни эплай олмасам, ўз фаолиятимни бутунлай тугатаман”, – деб таъкидлаб ўтди Исинбаева.

Маълумот учун, Исинбаева аёллар ўртасида лангарчўп билан баландликка сакраш бўйича икки карра Олимпия чемпиони, 2012 йилги Олимпия ўйинлари бронза медали соҳиби, етти карра жаҳон чемпиони, Европа чемпиони, 28 марта жаҳон рекорди соҳиби ҳисобланади. Унга Россияда хизмат кўрсатган спорт устаси мақоми берилган.

2005 йил 22 июлда Лондонда ўтказилган мусобақаларда лангарчўп билан баландликка сакраш бўйича аёллар ўртасида тарихда 5 метрлик баландликни забт этган биринчи аёл бўлган. 2012 йилда Россиянинг энг муваффақиятли аёл спортчиси деб тан олинган.