Осиё чемпионлар лигасининг саралаш босқичидан ўрин олган “Бунёдкор” ва “Ал-Жазира” жамоалари ўртасидаги учрашувдан олдинги матбуот анжумани бўлиб ўтди. Дастлаб Амирлик клуби бош мураббийи Эрик Гаретс ва ҳимоячи Башир Саид журналистларнинг саволларига жавоб беришди.

— Эртага бизни қийин ўйин кутиб турибди. “Бунёдкор”ни ҳурмат қиламиз, — дейди бош мураббий.

— Рақибни ҳурмат қилган айтишим мумкинки, эртага биз ғалаба учун майдонга тушамиз. Эртанги ўйин рақибимизга ва албатта ўзимизга ҳам омад тилайман, — дейди Башир Саид.

— Ўзбекистонда миллий чемпионат бошланмагани боис “Бунёдкор”ни қай тарзда ўргандингиз?
— Биз “Бунёдкор”ни Туркиядаги назорат ўйинлари орқали кузатдик. Шунингдек, жамоанинг аввалги ўйинлари ёзилган видеоёзувларини таҳлил қилиб чиқдик.

— Эртанги ўйин тезкор футбол кўрсатишга халал бериши мумкинми?
— Ҳар иккала жамоа бир хил шароитда бўлади. Об-ҳаво кимгадир устунлик беради, деб ўйламайман. Бундан ташқари, мен бельгияликман, совуқ ҳавога кўникканман.

— Тўқнашув фақат битта ўйиндан иборат бўлади. Бу баҳсга жамоа қандай тайёргарлик кўрди?
— Албатта, ўз уйида ўйин ўтказиш "Бунёдкор"га ёрдам бериши мумкин. Ўз уйингда деворлар ҳам ёрдам беради, деган ибора бекорга айтилмаган. Нима бўлган тақдирда ҳам биз ғалаба қозониб, гуруҳ босқичига чиқишга ҳаракат қиламиз.

— Саралаш босқичининг фақат битта ўйиндан иборатлигига муносабатингиз?
— Албатта, плей-офф босқичи иккита ўйиндан иборат бўлса, яхши бўларди. Биз эса ОФКнинг қарорини ҳурмат қиламиз.

— "Бунёдкор"нинг қайси футболчисини алоҳида қайд этасиз?
— Рақиб ўйинларини ўрганиш орқали, унинг ҳар бир футболчиси ҳурматга лойиқ эканини билдим. Алоҳида битта номни айтмаган бўлардим.