"Спорт" канали орқали эфирга узатилган "Футбол шарҳи" кўрсатуви меҳмони бўлган таниқли мутахассис Ислом Аҳмедов "Бунёдкор"нинг ОЧЛ саралаш босқичи доирасида "Ал-Жазира"га бўладиган ўйини борасида ўз фикрларини билдириб ўтди.

"Эртага бўладиган "Ал-Жазира"га қарши ўйинда "Бунёдкор" ҳеч `қандай муаммога дуч келмаслиги керак. Қачонгача рақиб кучли экан, унинг таркибида кучли футболчилар бор экан деб хавотир олишимиз керак? "Бунёдкор" — профессионал клуб. Жамоа декабрь ойида мавсумга тайёргарликни бошлаб, ўзи истаган футболчиларни таркибга таклиф қилди, ўзи истаган жойда ўқув-машғулот йиғинини ўтказди.

Яқинда Тожикистон мураббийлар курсида инструктор сифатида иштирок этиб қайтдим. Ўшанда "Хайр" клуби ОФК кубоги саралаш босқичи доирасида Бангладеш жамоаси билан ўйинини кўрдим. Тожикистон клуби ушбу ўйинга атиги 2 ҳафта олдин йиғилиб, тайёргарликни бошлаган. Уларнинг хориждаги йиғин ўтказиши ҳақида ҳеч қанақа гап йўқ. Улар ҳаттоки Тожикистоннинг ўзида нормал тайёрланиш учун имкониятга эга бўлишмади. Шу аҳволда майдонга чиқишди ва Бангладеш жамоасини зўрға ютишди.

Бизда эса вазият бутунлай бошқача. Бизда барча шароит бор. "Бунёдкор"да Ўзбекистоннинг энг иқтидорли футболчилари йиғилган. Тўғри, "Ал-Жазира"ни ҳурмат қилиш керак. Рақибнинг ҳурматини жойига қўйган ҳолда, майдонга чиқиш керак ва ғалаба қозониш лозим. Бошқача бўлиши мумкин эмас", - дейди Ислом Аҳмедов.