Париж метросида содир бўлган "Челси" мухлисларининг ирқчилик воқеасининг қатнашчиларидан бири Шимолий Ирландиянинг ҳуқуқни ҳимоя қилиш органларининг собиқ ходими, ҳозирда The World Human Rights Forum ҳуқуқни ҳимоя қилувчи ташкилотининг директори бўлиб чиқди.

The Guardian нашрининг маълум қилишича, унинг исми Ричард Баркли. Унинг адвокати бўлиб ўтган воқеа юзасидан баёнот берди.

"Ҳимоямдаги шахс ҳақиқатдан ҳам воқеага аралашган. Унда Сулаймон исмли фуқаро метро вагонига киритилмаган. Аммо у ирқчиликка оид қўшиқ куйламаган ва куйлаганларни қўллаб-қувватламаган. У воқеани тушунтириш учун маҳаллий полицияга мурожаат қилган. У воқеа акс этган видеони томоша қилишни хоҳламоқда, бунда у ирқчиликка оид ҳаракатлар содир қилмаган.

Шунингдек, менинг ҳимоямдаги Баркли Сулаймон исмли фуқародан етказилган руҳий зарба ва стресс учун чин кўнгилдан кечирим сўрамоқчи", - дейди адвокат.