Матбуот анжуманининг иккинчи қисмида “Насаф” устози Рўзиқул Бердиев ва жамоа сардори Артур Геворкян иштирок этишди.

Р.Бердиев: — Жамоамизни Осиё чемпионлар лигаси мусобақасида иштирок этишини барча мухлислар хоҳлаган эди. Эртадан бошлаб қитъамизнинг ушбу нуфузли мусобақасида иштирокимизни бошлаймиз ва муносиб қатнашишга ҳаракат қиламиз. Ўйинга келадиган бўлсак, рақибни атрофлича ўрганиб чиқдик. “Тракторсозий” охирги йилларда барқарор жамоа сифатида шаклланиб келмоқда ва ўз ўйин услубига эга. Рақибимиз оддий жамоа эмас. Об-ҳавонинг бироз инжиқ келиши ҳам бизни мақсадимиздан қайтаролмайди. Эртага фақат ғалаба учун ҳаракат қиламиз.

— Рақиб жамоа мураббийи гуруҳ фаворити сифатида иккита “Ал-Аҳли” жамоасини эътироф этди...
— Мен ундай демаган бўлардик. Барчада имконият бир хил. Лекин Эрон ва ўзбек футболининг ўхшаш томонлари кўп. Ҳар иккала жамоа кўпроқ маҳаллий футболчилардан ташкил топган.

— Жамоанинг жисмоний ҳолати қай даражада?
— Мавсумолди йиғинларда айнан шу жиҳат устида алоҳида ишладик.. Ўйин амалиётимиз камроқ бўлсада, жамоа 95-100 фоиз ўйинга тайёр. Умуман ўтган мавсумда ОЧЛдаги ўйинларимиз бизга катта мактаб бўлди. Ўшанда “Ал-Жазира”ни икки тўп фарқи билан ютиб туриб, яна ва яна олдинга интилганмиз. Ўшанда бироз ақллироқ ўйнаганимизда, натижа бошқача бўларди. Бу сафар натижа учун ҳам ўйнаймиз.

Артур Геворкян: — Ўйинга яхши тайёргарлик кўрдик. Ўйлайманки, об-ҳаво бизга халақит қилмайди. Мухлисларни хурсанд қилишга уринамиз.