Юракка қўлни қўйиб шуни айтмоқчиманки, ўзимизнинг жамоалар бизни икки ҳафта худди биз кутган футбол ҳавосидан баҳраманд қилишди. Ишқибозлар мана шундай шижоатли ўйинларни ёқтиришади-да! Тўртовлон клубларимизга бунинг учун алоҳида ташаккурлар! Энди, қитъамизнинг энг зўр клублари ўртасида ўтказиладиган турнир таҳлили ҳақидаги фикрларим билан ўртоқлашсам...
Рамкадан чиққан - “Бунёдкор”
Доим бир йўсинда қайтарилаверадиган ўҳшашликни – стреотип деб, атайдилар, чоғи. Балки, мен нотўғри айтгандирман, лекин “Қалдирғочлар” ўша ҳар баҳор такрорланаверадиган – метафора, яъни кетма-кетликни бу йил барбод қилди-қўйди. Шарҳловчи ва мутахассислар томонидан – бизни юртимизда ҳали мавсум бошланмагани учун жамоаларимизни ҳолати яхши эмаслиги аниқ, чунки улар бирор марта расмий ўйинда майдонга тушганлари йўқ,-деган гапларини эшитавериб, зада бўлиб кетганмиз.
Бўлар экан-ку! “Бунёдкор” ўша таркиби машҳур ўйинчилардан иборат, дея бизни чўчитаётган “Ал-Жазира”ни ўтиш ўйинида - юз фоиз ютди. Тактикада ҳам, футболчиларнинг жисмоний тайёргарлигида ҳам , ўйинчиларни майдонда бир-бирини тушуниб ўйнаш борасида ҳам - Лушан шогирдлари - рақибларига дарс бердилар.
Оҳ,оҳ, оҳ... Майдондаги ўйин сифати, узоқ ва кўндалангига берилган аниқ паслар, Сардорни португалиялик Криштиауна сингари финтлар билан чўчимай ҳаракат қилиши, Зуаги ва Сатонинг дриблинглари, буларни барини биз ҳали узоқ вақт эслаб, тамшаниб юрамиз. Тоза ва аниқ фалсафага эга сифатли футбол мана шундай бўлади.
Мутахассисларларга айтар сўзим шу: юқоридаги баҳоналарни энди вақти ўтди, исботини эса “Бунёдкор” намойиш этган ўйиндан изланг!
-Профессионал жамоа ва унинг футболчилари йил давомида ўн икки ой доим юксак тайёргарликка эга бўлиши керак! - менимча, бу марҳум футбол даҳоларидан бири бўлган Валерий Лобановскийнинг гаплари эди
Гуруҳ баҳслари интиҳоси
Ёмон бошламадик... Кўз тегмасин! Қитъа клублари мусобақаси гуруҳ босқичини “Пахтакор” бошлаб берди. “Нафт” клуби анойилардан эмаслиги илк дақиқалардан кўриниб қолди. Лекин, пойтахт жамоаси бу куни Эрон жамласидан кучлироқ эди. Буни футбол ўйини индаллосини кўрсатиб турадиган – стадион калькулятори бўлган табло намоён этиб туради. Ҳисоб 2:1.
Мени гапим кимгадир муболаға бўлиб туюлмасин!... Тўғриси, бу йилги “Бунёдкор” - киборларча ўйин кўрсатяпти. Кўча-кўйда мухлислар фақат мана шу жамоа ўйини ҳақида кўпроқ гапиришгани, аниқ ва тиниқ гап. Лушан шогирдлари эркалаб кетмасинлар, лекин уларнинг ўйинда маъно, мазмун ва мақсад бор. Ёшларга ишониш Лушаннинг ютуқли қартаси. Бошқа гап йўқ.
“Насаф” – мухлислар ёқимтойи эканлигини яна бир бор исботлади. Тўғри жамоа тоза ва бехато ўйинлар кўрсатмагандир. Лекин, қаршиликлардаги мухлислар кўнгилини олиш учун бор кучини бериб ўйнаш хусусияти минг бора таҳсинга лойиқ...
Ўйин рельсини излаётган - “Локо”... Чоржамоа ичида, кайфиятимизни бузган ягона вакилимиз. Мени гапларимни ҳозир кўпчилик танқид қилиши тайин. Мана шу жамоа ҳам тоза, оврўпа клубларисифат киборларча ўйин кўрсатди. Ютқазгани рост! Абрамов жамоасида рақиб ўйинчиларига ўҳшаш индивидуал, ўйинни ўзига оладиган футболчи йўқлиги сабаб, ютқазди. Мураббий хулосани чиқариши керак.
Тўрт ўйинда кўнгилимизни хира қилган жиҳатлар...
Биринчиси, ишонган ва биз тажрибали деб атайдиган – Копадзе, Зотеев, Лутфулла Тўраевларни ўта сифатсиз ўйини. “Локо” мағлубиятини асосчиси Тўраев, десам адашмайман. Футболчи дегани ҳам бир ўйинда шу даражада кўп хато қиладими? “Пахтакор” футболчиси Шерзод Каримовни ва “Бунёдкор” легионери Сатонинг хурмача қилиқлари. Бири яккакураш устаси, яна бири - танилмаган волейболчи экан. Шерзод ўз қилиғи сабаб, жамоани ёмон аҳволга солган бўлса, иккинчисини ҳакам икки бор пайқамади. “Локо” дарвозабони Аброр ҳали олий лига ўйинларига ҳам тайёр эмаскан! Ҳимоячилар - дарвозабон йўқ, деган фикр билан майдонда тўп суришди, десам хато бўлмаса керак.
Иккинчиси, бу сабабни - минг бор қуллуқдан сўнг айтиш, керак. “Спорт” телеканали ходимлари бизга ажойиб баталияларни жонли олиб беришаётгани учун аввало, каттакон ташаккур! Лекин, пойтахтда бўлиб ўтган икки ўйинни трансляция сифати жуда кўплаб мухлислар эътирозига сабаб бўлди. Операторлар майдондаги воқеалар билан тенгма-тенг юра олишмаяпти. Такрорлар керак жойлардан эмас. Шарҳловчилар бир-икки дақиқа олдин юзага келган вазиятни қайта кўрсатишганида нима дейишни билмай қолишганига кўп бор гувоҳ бўлдик. Шерзодга қизил карточка кўрсатилган вазият ҳалигача мавҳумлигича қолди, ҳисоб. “Бунёдкор” ва “Локомотив”нинг сафардаги ўйинлари намойиши билан бизникининг фарқи жуда катта.
Ҳай нима бўлганда ҳам ОЧЛ карвони йўлга чиқиб, илк таассуротларимиз ёмон эмас. Ўйлаймизки, навбатдаги ўйинлар бизни яна футболнинг мафтункор ва сеҳрли оламига сайр қилдиради.
Якундаги хулосам шундан иборат: бизни жамоаларни Осиёда ҳеч кимдан кам жойи йўқ экан! Биз ҳали узоқроққа борамиз!
