Сайёрамизнинг иккинчи ракеткаси швейцариялик Рожер Федерер БААнинг Дубай шаҳрида якунига етган турнирда ўз чемпионлик унвонини муваффақиятли ҳимоя қилди. Федерер Dubai Duty Free Tennis Championships турнирининг ҳал қилувчи финал учрашувида дунёнинг биринчи ракеткаси сербиялик Новак Жоковичга қарши кортга чиқди.
Бир соату 24 дақиқа давом этган финал баҳсида швейцариялик теннисчи 6:3, 7:5 ҳисобида зафар қучди. Баҳс мобайнида Федерер 11, Новак эса бор йўғи битта “эйс” зарбани амалга оширди. Икки теннисчи ўртасидаги ўзаро учрашувлар тафовути 20:17га етди, Рожер фойдасига.
Рожер Федерер бу билан еттинчи маротаба Дубай турнири ғолибига айланди. Бу галги ғалаба Федерерга фаолиятидаги 84-совринни тақдим этди. Дубайдаги муваффақиятли иштирок швейцариялик теннисчига 505 минг доллар мукофот пули ҳамда 500 рейтинг очкоси келтирди.
