Осиё чемпионлар лигасининг 2-туридан ўрин олган "Бунёдкор" ва "Персеполис" жамоалари ўртасидаги ўйиндан олдин матбуот анжумани ўтказилди. Матбуот анжуманининг иккинчи қисмида "Персеполис" бош мураббийи Ҳамид Дерахшан иштирок этди.

"Эртага яхши ўйин бўлади деб умид қиламан. "Бунёдкор" жамоаси ҳақида етарли маълумотга эгамиз. Бу жамоани яхши биламиз. "Бунёдкор"нинг аввалги ўйинларини таҳлил қилиб чиққан ҳолда ўйин режасини белгилаймиз. Бизнинг мақсадимиз фақат ғалабага қаратилган. Бунинг учун бор имкониятимизни ишга соламиз", - дейди теҳронликлар бош мураббийи.

"Икки футболчимиз жароҳат боис Эронда қолди. Қолган футболчилар уларнинг йўқлигини билдирмасликка ҳаракат қилишади. Жамоамиз ҳозир жудаям яхши формада. Биринчи турдаги рақибимиз кучли жамоа эди. ОЧЛдаги дастлабки қадамни яхши қўйдик. Умид қиламиз, кейинги ўйинларда ҳам шундай ишончли ўйин намойиш этамиз", - дейди Ҳамид Дерахшан.

"Биз Эрон чемпионатида энг кўп мухлисга эга бўлган жамоамиз. Умид қиламан, Ўзбекистонда яшаётган эронлик мухлислар эртанги ўйинда бизни қўллаб-қувватлаш учун келишади" - дея ўз сўзини якунлади "Персеполис" бош мураббийи.