8 март куни “Бунёдкор” ўйингоҳида Ўзбекистон суперкубоги учун ўтказилган баҳсда “Локомотив” жамоаси ғалаба қозониб, ўз тарихида илк бор суперкубок соҳибига айланди.
Хўш, нега унда мухлислар “Пахтакор” клуби ўйинчиси Владимир Козакни олқишлади? Бу савол сизда ҳам пайдо бўлгандир, эҳтимол. Бу ҳолат ўйин вақтида эмас, баҳс бошланишидан сал аввалроқ юз берди. “Пахтакор” футболчилари шунчаки чигалёзди машқларини бажараётган пайтда Владимир Козак тепган тўп ўйингоҳга томоша қилиш учун ташриф буюрган аёлнинг юзига зарб билан бориб тегди. Яна 8 март – халқаро хотин-қизлар куни-я…
Аёлга шифокорлар шошилинч тиббий ёрдам кўрсатишди. Владимир Козак шахсан ўзи бориб аёлдан юзага келган ҳолат учун узр сўради. Шунда ўйингоҳга йиғилган мухлислар “Пахтакор” футболчисини ўринларидан туриб олқишлашди.
Бу ҳодиса нафақат Козакнинг хотирасида, балки байрам куни кутилмаган зарбани қабул қилган аёл хотирасида ҳам узоқ вақт сақланиб қолса, ажаб эмас. Нима дейсиз, ҳаётда шунақаси ҳам бўлиб турар экан…
