Эртага Ўзбекистон чемпионатининг Олий лигаси янги мавсумига старт берилади. Осиё чемпионлар лигасида иштирок этадиган 4 жамоамиз ўз ўйинларини 12 март куни ўтказишса, қолган ўйнлар 14 март, шанба куни ўтказилади.

Пайшанба куни эса Тошкентда 2та ўйин белгиланган. “Пахтакор” ўз майдонида “Олмалиқ” билан ўйнаса, “Бунёдкор” “Бухоро”ни қабул қилади. ОЧЛнинг 3-тур ўйинини “қалдирғочлар” 17 март куни, Бабаян жамоаси эса 18 март куни ўтказишини инобатга олиб, “Пахтакор”нинг Олий лигадаги ўйинини 13 март кунига белгилаш мумкин эди. Шунда бу мухлислар учун ҳам, “Спорт” канали учун ноқулай яратилмасди.

Биз ушбу масалада Ўзбекистон профессионал футбол лигаси бош директори Фарҳод Магометовга мурожаат қилдик.

“Биринчи тур ўйинлари ОЧЛда иштирок этадиган клубларимизнинг манфаатидан келиб чиқиб тузилди. ОЧЛда иштирок этадиган клубларимизнинг ўйинларини бир кунга қўйишимизнинг сабаби шундан. Буни янги мавсум тақвими тузилаётган пайтда айтганмиз. Бунда деярли муаммо кўрмаяпман. Шунчаки, иккала ўйиннинг бошланиш вақтлари ҳар хил вақтга белгиланмоқда. Мухлислар ҳар иккала ўйинни ҳам томоша қилишлари мумкин”, — дея жавоб берди ЎзПФЛ раҳбари.

Эслатиб ўтамиз, "Пахтакор" - "Олмалиқ" ўйини 12 март куни 15:00да, "Бунёдкор" - "Бухоро" баҳси эса 18:30да бошланади.