O‘zbekiston terma jamoasining JCH-2018 yo‘lidagi raqibi — Eron termasi bosh murabbiyi Karlush Keyrush o‘z lavozimini tark etishga qaror qildi.
63 yoshli mutaxassis buning sabablarini Facebook’dagi sahifasida ma’lum qildi.
«Do‘stlar, Eron futbol federasiyasi prezidenti bilan besh soatlik muzokaralardan so‘ng terma jamoadan ketish haqida ariza yozdim. Terma jamoaning JCH–2018 saralash bahslariga tayyorgarlik rejalarini amalga oshirish uchun hech qanday sharoit yo‘qligi, futbol federasiyasiga qarshi bo‘lganlarning ko‘pligi, terma jamoa g‘alabasini o‘ylamaydigan sport agentlari borligi uchun bu qarorga keldim. Mag‘lubiyatsiz bir yil, JCH–2018 saralashi 3-bosqichida guruhda birinchi o‘rinda bo‘lganimiz, FIFA reytingida Eron Osiyoning eng kuchli jamoasi bo‘lganidan keyin ham Eron futbol federasiyasi tayyorgarlik rejasini amalga oshirish uchun hech qanday sharoiti hamda vakolati yo‘qligini aytmoqda» - deb yozdi Karlush Keyrush.
Ayni paytda Eron terma jamoasi JCH-2018 saralash guruhida 11 ochko bilan peshqadamlik qilayotgan bo‘lsa, Janubiy Koreya 10 ochko bilan 2-o‘rindan joy olgan. O‘zbekiston terma jamoasi 9 ochko bilan 3-pog‘onada bormoqda.
