O‘zbekiston milliy terma jamoasi yarim himoyachisi, bir necha kun avval Eronning "Istiqlol" klubi a’zosiga aylangan Server Jeparov yangi jamoaga o‘tishi, klub istiqboli va bo‘lajak raqiblari haqida o‘z fikrlarini bildirib o‘tdi.  

O‘zbekistonlik futbolchi “Istiqlol” bilan shartnoma imzolaganidan mamnun ekanini aytib o‘tdi. 

– “Istiqlol” klubi bilan shartnoma imzolaganimdan xursandman. Klub katta tarixga ega ekani hamda ko‘plab muxlislari borligini bilaman. “Istiqlol” g‘alabalariga hissa qo‘shib, muxlislarni xursand qilishga umid qilaman, – dedi 35 yoshli yarim himoyachi.

Server Jeparov “Istiqlol”ga tegishli bo‘lgan hamda 95 225 muxlisga mo‘ljallangan “Ozodi” stadioni haqida ham qisqacha to‘xtalib o‘tdi.

– “Ozodi”stadioni juda katta va go‘zal. O‘zbekiston termasining Eronga qarshi uchrashuvlarida bu erga kelganman. Stadiondagi muhit o‘zgacha, – deydi Jeparov.

Shuningdek, tajribali yarim himoyachi “Istiqlol”ning Osiyo Chempionlar Ligasi–2017 turniridagi imkoniyatlari haqida so‘zlab berdi. Tehron klubi guruh bosqichiga chiqish uchun pley-off bosqichida Qatarning “Al-Sadd” klubiga qarshi bahs olib boradi.

– “Al-Sadd”ga qarshi o‘yin oson bo‘lmaydi. Ammo Osiyo Chempionlar Ligasining kamida chorak finaliga chiqishga umid qilamiz. “Istiqlol” bosh murabbiyi Alirizo Mansurian menga ishonch bildirda va bu ishonchni oqlashga harakat qilaman, – deya fikrini yakunladi Jeparov.

Ma’lumot uchun, Eron Pro Ligasi vakili – Tehronning “Istiqlol” klubi joriy mavsumda 16-turdan keyin 25 ochko bilan 16 ta jamoa orasida 5-pog‘onani egallab turibdi.