Avstraliya ochiq chempionatining ikkinchi bosqichida Novak Jokovichni mag‘lub etgan Denis Istomin bilan intervyu «Uz.24.uz» nashri tomonidan taqdim etildi. Suhbat davomida O‘zbekistonning birinchi raqamli raketkasi uning muvaffaqiyatlariga onasi sababchi ekani haqida aytib o‘tdi.

«Onam — mening murabbiyim. Tinimsiz parvozlarim davomida u menga tez-tez hamrohlik qiladi. Jarohatimdan keyin katta sportga qayta olganim men uchun mo‘’jiza bo‘lgandi. Avtohalokatga uchragandim, og‘ir o‘tgandi hammasi. O‘shanda ham onam suyanchig‘im bo‘lgan. U menga umid bergan, to‘lqinlantirgan» - dedi Istomin.

Tennischi suhbat davomida o‘tmishga boqishi va nimadan qo‘rqishiga ham oydinlik kiritgan.

«Bu dunyoda meni qo‘rqita oladigan narsalar ko‘p deb o‘ylamayman. O‘ylashimcha, vaqti kelib karyeramni yakunlashim cho‘chitadi. Bu oson o‘tib ketmasligini his qilaman. O‘tmishni eslab turishga hozir vaqtim yo‘q. Balki o‘sha vaqtlarda nimadandir noligandirman, hozir esa yo‘q. Men ortga nazar tashlashni emas, faqat oldinga qadam bosishni o‘ylayman» - dedi Istomin.

Jurnalistning eng chiroyli tennischi qiz kim degan savoliga Denis Istomin Ana Ivanovich deb javob bergan. Qayd etish kerak, Ivanovich 2016 yil germaniyalik mashhur futbolchi Bastian Shvaynshtayger bilan oila qurgandi.