Tennis bo‘yicha «Katta dubulg‘a» turkumiga kiruvchi Australian Open–2017 turnirining nimchorak finalida ATP reytingida 117-o‘rinda borayotgan o‘zbekistonlik Denis Istomin dunyoning 15-raketkasi – bolgariyalik Grigor Dimitrovga qarshi kortga tushadi.

Nimchorak final yo‘lida Istomin avval ATP reytingida 170-o‘rinda borayotgan xorvatiyalik Ivan Dodigni (6:1, 6:4, 3:6, 7:5), keyin esa jahonning 2-raketkasi Novak Jokovichni (7:6, 5:7, 2:6, 7:6, 6:4) sensasion tarzda mag‘lubiyatga uchratib, xalqaro nashrlarning e’tiboriga tushdi. Uchinchi davrada esa o‘zbekistonlik tennichi dunyoning 31-raketkasi – ispaniyalik Pablo Karreno Bustaga (6:4, 4:6, 6:4, 4:6, 6:2) imkoniyat qoldirmadi.

Grigor Dimitrovning 1/8 finaliga qadar yo‘li biroz oson kechdi. Birinchi davrada u avstraliyalik Kristofer O‘Konnellni (ATP 231-o‘rin), ikkinchi davrada Janubiy koreyalik Xyon Chungni (ATP 105-o‘rin) mag‘lubiyatga uchratdi. Uchinchi davrada esa Dimitrov dunyoning 18-raketasi – fransiyalik Rishar Gaskeni taslim qildi.

30 yoshli Istomin bolgaliyalik 25 yoshli tennischi bilan atigi bir marta to‘qnash kelgan. 2014 yili Shanxaydagi Masters turnirida Grigor Dimitrov 6:3, 6:3 hisobida Istomindan ustun kelgandi.

Denis Istomin va Grigor Dimitrov o‘rtasidagi 1/8 final uchrashuvi ertaga, 23 yanvar kuni Toshkent vaqti bilan soat 11:00 da boshlanishi rejalashtirilgan.

Qayd etish joiz, Australian Open–2017 turnirining nimchorak finaliga chiqqan O‘zbekiston vakili 165 ming dollar mukofot puli va 90 reyting ochkosini naqd qilib bo‘ldi. Agar u chorak finalga yo‘l olsa, 330 ming dollar va 360 reyting ochkosiga ega bo‘ladi.