Теннис бўйича «Катта дубулға» туркумига кирувчи Australian Open–2017 турнирининг нимчорак финалида ATP рейтингида 117-ўринда бораётган ўзбекистонлик Денис Истомин дунёнинг 15-ракеткаси – болгариялик Григор Димитровга қарши кортга тушади.
Нимчорак финал йўлида Истомин аввал ATP рейтингида 170-ўринда бораётган хорватиялик Иван Додигни (6:1, 6:4, 3:6, 7:5), кейин эса жаҳоннинг 2-ракеткаси Новак Жоковични (7:6, 5:7, 2:6, 7:6, 6:4) сенсацион тарзда мағлубиятга учратиб, халқаро нашрларнинг эътиборига тушди. Учинчи даврада эса ўзбекистонлик тенничи дунёнинг 31-ракеткаси – испаниялик Пабло Каррено Бустага (6:4, 4:6, 6:4, 4:6, 6:2) имконият қолдирмади.
Григор Димитровнинг 1/8 финалига қадар йўли бироз осон кечди. Биринчи даврада у австралиялик Кристофер ЎКоннеллни (ATP 231-ўрин), иккинчи даврада Жанубий кореялик Хён Чунгни (ATP 105-ўрин) мағлубиятга учратди. Учинчи даврада эса Димитров дунёнинг 18-ракетаси – франциялик Ришар Гаскени таслим қилди.
30 ёшли Истомин болгалиялик 25 ёшли теннисчи билан атиги бир марта тўқнаш келган. 2014 йили Шанхайдаги Masters турнирида Григор Димитров 6:3, 6:3 ҳисобида Истоминдан устун келганди.
Денис Истомин ва Григор Димитров ўртасидаги 1/8 финал учрашуви эртага, 23 январь куни Тошкент вақти билан соат 11:00 да бошланиши режалаштирилган.
Қайд этиш жоиз, Australian Open–2017 турнирининг нимчорак финалига чиққан Ўзбекистон вакили 165 минг доллар мукофот пули ва 90 рейтинг очкосини нақд қилиб бўлди. Агар у чорак финалга йўл олса, 330 минг доллар ва 360 рейтинг очкосига эга бўлади.
