Faoliyatini Turkiya Super ligasida davom ettirayotgan Lukash Podolski mamlakat kubogi doirasida 5 ta gol urishga muvaffaq bo‘ldi.

U to‘p suradigan «Galatasaroy» o‘z maydonida «Erzinjanspor» klubini qabul qildi va 6:2 hisobida muvaffaqiyat qozondi. Gollarning 5 tasi Lukash Podolski hisobiga yozildi. Klubning Twitter’dagi sahifasi ma’lumotiga ko‘ra, so‘nggi bor Jardel «Galatasaroy» uchun 5 ta gol urgan bo‘lib, bu voqeaga 6002 kun vaqt to‘lgandi. Aniqrog‘i, Jardel 2000 yilning 19 avgust kuni turk klubi uchun 5 ta gol urib bergandi.

Turkiya kubogida 32 ta jamoa sakkiz guruhga bo‘lib yuborilgan bo‘lib, ikki davra o‘yinlari o‘z yakuniga yetdi. «Galatasaroy» «E» guruhini «Tuzlaspor»dan keyin 2-o‘rinda yakunladi.

Mamlakat Super ligasining 18-turidan keyin «Galasaroy» peshqadam «Beshiktosh»dan 5 ochko ortda qolgani holda 3-o‘rinni egallab turibdi.

Turkiya kubogi bellashuvlarida Podolski 7 ta gol bilan to‘purarlar reytingida ikkinchi bo‘lib turibdi. Super liganing 11 ta o‘yinida bor-yo‘g‘i 3 ta gol urgan hujumchi chempionati to‘purarlari ro‘yxatida ko‘rinish bermagan.