2016 yilgi mavsumning kashfiyot jamoasiga aylangan «Buxoro» klubida kuni kecha jiddiy o‘zgarishlar yuz berdi.
23 yanvar, dushanba kuni klub rahbariyati yig‘ilish o‘tkazib, Jamshid Saidov va Tachmurod Agamurodov boshchiligidagi murabbiylar shtabini iste’foga chiqardi. Natijada klubning bir qator yetakchi futbolchilari ham jamoani tark etish arafasida turishibdi.
O‘tgan mavsumda Oliy Ligada 4-o‘rinni egallab, muxlislar tashrifi borasida ham eng yetakchi jamoaga aylangan «Buxoro» klubi atrofida ro‘y berayotgan gap-so‘zlar hech kimni bee’tibor qoldirmayapti. Klub odatdagidek yangi mavsumga tayyorgarlik ko‘rayotgan bir paytda keskin o‘zgarishlarning yuz berishi ajablanarli bo‘ldi. Endi klubni kim boshqaradi va jamoa tarkibi qanday ko‘rinish oladi?
Klubdagi vaziyatga oydinlik kiritish maqsadida «Buxoro» bosh murabbiyi Jamshid Saidovga murojaat qilganimizda, murabbiy ham iste’foga chiqarilganligini ma’lum qildi.
— Jamshid aka, to‘g‘risi, “Buxoro” klubida sodir bo‘layotgan o‘zgarishlar barchamizni hayron qoldiryapti. Klubda nimalar bo‘lyapti?
— Buxoro viloyat hokimiyatda yig‘ilish bo‘ldi, u yerdan chiqqanimizga ikki soat bo‘ldi. Unda klubdan ketishimizni ma’lum qilishdi. (suhbat dushanba kuni o‘tkazilgan)
— Bunday iste’foni qanday qabul qildingiz?
— Hammasi joyida. Rahbarlarga yoqmagan bo‘lsak, yana nima ham qila olardik. Balki boshqa murabbiylarga ishonch bildirishayotgandir. To‘g‘risi, klubdan ketishimizga qanday sabab bo‘lganini bilmadim.
— Bungacha “Buxoro”ni yangi mavsumga o‘zinglar tayyorlayotgandinglar. Yanvar oyi ham tugab boryapti. Tayyorgarlik rejasi davom etayotgandi. Bunday paytda o‘z munosabatingizni ham bildirdingizmi?
— Meni ham to‘g‘ri tushuning. Oradan ma’lum vaqt o‘tganidan so‘ng nima uchun bunday o‘zgarishlar bo‘lganini aytishim mumkin. Anig‘i shuki, rahbariyatning qarori bilan ishdan bo‘shadik.
— Endi tarkib nima bo‘larkin? Har holda hammasi sizlarning rejalaringiz asosida davom etayotgandi…
— Biz endi futbolchilarga hech nima ayta olmaymiz. Yangi rahbariyat tarkib masalasida shug‘ullanishga kirishadi. Endi bizning “Buxoro” klubiga aloqamiz yo‘q. Vaziyat bunday tus olishini umuman kutmagandik.
