2016 йилги мавсумнинг кашфиёт жамоасига айланган «Бухоро» клубида куни кеча жиддий ўзгаришлар юз берди.

23 январь, душанба куни клуб раҳбарияти йиғилиш ўтказиб, Жамшид Саидов ва Тачмурод Агамуродов бошчилигидаги мураббийлар штабини истеъфога чиқарди. Натижада клубнинг бир қатор етакчи футболчилари ҳам жамоани тарк этиш арафасида туришибди.

Ўтган мавсумда Олий Лигада 4-ўринни эгаллаб, мухлислар ташрифи борасида ҳам энг етакчи жамоага айланган «Бухоро» клуби атрофида рўй бераётган гап-сўзлар ҳеч кимни беэътибор қолдирмаяпти. Клуб одатдагидек янги мавсумга тайёргарлик кўраётган бир пайтда кескин ўзгаришларнинг юз бериши ажабланарли бўлди. Энди клубни ким бошқаради ва жамоа таркиби қандай кўриниш олади?

Клубдаги вазиятга ойдинлик киритиш мақсадида «Бухоро» бош мураббийи Жамшид Саидовга мурожаат қилганимизда, мураббий ҳам истеъфога чиқарилганлигини маълум қилди.

— Жамшид ака, тўғриси, “Бухоро” клубида содир бўлаётган ўзгаришлар барчамизни ҳайрон қолдиряпти. Клубда нималар бўляпти?

— Бухоро вилоят ҳокимиятда йиғилиш бўлди, у ердан чиққанимизга икки соат бўлди. Унда клубдан кетишимизни маълум қилишди. (суҳбат душанба куни ўтказилган)

— Бундай истеъфони қандай қабул қилдингиз?

— Ҳаммаси жойида. Раҳбарларга ёқмаган бўлсак, яна нима ҳам қила олардик. Балки бошқа мураббийларга ишонч билдиришаётгандир. Тўғриси, клубдан кетишимизга қандай сабаб бўлганини билмадим.

— Бунгача “Бухоро”ни янги мавсумга ўзинглар тайёрлаётгандинглар. Январь ойи ҳам тугаб боряпти. Тайёргарлик режаси давом этаётганди. Бундай пайтда ўз муносабатингизни ҳам билдирдингизми?

— Мени ҳам тўғри тушунинг. Орадан маълум вақт ўтганидан сўнг нима учун бундай ўзгаришлар бўлганини айтишим мумкин. Аниғи шуки, раҳбариятнинг қарори билан ишдан бўшадик.

— Энди таркиб нима бўларкин? Ҳар ҳолда ҳаммаси сизларнинг режаларингиз асосида давом этаётганди…

— Биз энди футболчиларга ҳеч нима айта олмаймиз. Янги раҳбарият таркиб масаласида шуғулланишга киришади. Энди бизнинг “Бухоро” клубига алоқамиз йўқ. Вазият бундай тус олишини умуман кутмагандик.