UFC chempioni Konor Makgregor agentlari Floyd Meyvezer bilan muzokara olib borayotganini tasdiqladi. Bu esa ikki jangchi o‘rtasidagi to‘qnashuv muqarrar degan xulosaga sabab bo‘ldi.
«Nevadada bokschilik lisenziyasini qo‘lga kiritishim hamonoq Meyvezer bilan kelishib olaman. Jang shunchaki ko‘rib chiqilayotgani yo‘q, uning rejasi anchadan buyon ishlab chiqilmoqda. Mening keyingi jangim sakkiz unsiyali qo‘lqop kiygan holda kanatlar orasidan chiqishdan boshlanadi. Men bunga ishonaman» - dedi Konor Makgregor.
Ma’lumki, hozirgi kunga qadar Menni Pakyao va Floyd Meyvezer o‘rtasidagi jang gonorari eng katta ekani bilan ajralib turgandi. Makgregor orziqib kutilayotgan jang summasi bundan ikki marta ko‘proq bo‘lishiga ishonadi.
«Meyvezer va Pakyao yarim milliard ishlab topgan bo‘lsa, mening jangim bir milliardlik tarixdagi ilk jang bo‘ladi. Bu ishni bekorchilikdan qilayotganim haqida gap-so‘zlar bo‘lsa-da, menga farqi yo‘q. Habib, Toni, Joze yoki Vudli bilan UFC chempionligi uchun jang o‘tkazish men orziqib kutayotgan narsalar emas» - dedi Konor Makgregor, UFC chempioni.
