O‘tgan haftada France Football nashri o‘z o‘quvchilari orasida 1 Liganing eng yaxshi futbolchisini aniqlash borasida so‘rovnoma o‘tkazdi. Eng ko‘p ovoz to‘plagan Bernardo Silva muxlislarga ko‘ra hozirgi paytda Fransiya chempionatining eng yaxshi futbolchisi deb topildi.

Portugaliyalik futbolchi “Monako” safida 2014 yildan buyon o‘ynab kelmoqda. Dastlab, ijara asosida monegasklar safida o‘ynagan bo‘lsa, klub uni 2015 yil boshida 15,8 million yevroga sotib oldi. 22 yoshli Bernardo Silva “Monako” klubining muhim yetakchisiga aylandi. Hozirda ajoyib sport formasida bo‘lgan portugaliyalik futbolchi o‘yinni boshqarish, o‘yin taqdirini hal qilish kabi muhim vazifalarni o‘z zimmasiga olmoqda.

Mavsum boshidan beri monegasklar safida 5 gol va 5 golli uzatmani amalga oshirgan Bernardo Silva statistika bo‘yicha ajoyib ko‘rsatkichlarga ega. U jamoasining g’alabalarida muhim kalit vazifasini o‘tamoqda. Bu mavsumda ancha hujumkor o‘yin ko‘rsatayotgan “Monako”ning hujumlari asosan Bernardo Silva orqali amalga oshirilmoqda.

Yanvar oyi o‘rtasida Nevshatel kompaniyasi tomonidan o‘tkazgan hisob-kitoblarga ko‘ra, portugaliyalik futbolchining transfer qiymati 52,5 million yevroga teng. Bu esa Fransiya chempionatidagi eng qimmat futbolchi deganidir. Bu hisob-kitoblar albatta bir qator ko‘rsatkichlarga (gollar, golli uzatmalar, o‘tkazilgan daqiqa, shartnoma muddati, yoshi va h.k.) ko‘ra tuzib chiqilgan.