Yangi mavsumga tayyorgarlikni Toshkentda davom ettirayotgan «Dinamo» jamoasi navbatdagi nazorat uchrashuvini o‘tkazdi.

Ilhom Sharipov shogirdlari bu safar Toshkentning «Obod» klubiga qarshi saf tortishdi. Qiziqarli kechgan bahsda mezbon sanalmish «Obod» jamoasi «Dinamo»ni mag‘lub etdi.

Hisobni 26-daqiqada «Obod» sardori ochgan bo‘lsa, oradan besh daqiqa o‘tib muvozanat tiklandi. Kuni kecha «Dinamo»ga kelib qo‘shilgan hujumchi Abdumalik Abdullayev 31-daqiqada ikkinchi o‘yindagi ikkinchi golini urib, hisobdagi farqni yo‘qqa chiqardi, 1:1.

O‘yin davomida «Obod» safida Shoxruz Norxonov, Pavel Solominlarda imkoniyat bo‘lgan bo‘lsa, «Dinamo»chilardan Amirjon Safarov, Abdumalik Abdullayevlarda vaziyatlar bo‘ldi.

Ikkinchi bo‘lim ham tengkurashlar ostida kechgan bo‘lsada, gol urish «Obod» futbolchilariga nasib etdi. Yarimhimoyachi Sanjar To‘raqulov 60-daqiqada gol urib, yakuniy natijani o‘rnatdi, 2:1.

Nazorat bahsi. Toshkent. «Obod» stadioni.

7 fevral (seshanba)

«OBOD» - «DINAMO» - 2:1 (1:1)

Gollar: Doniyor Hasanov 26, Sanjar To‘raqulov 60 – Abdumalik Abdullayev 31.

«Dinamo»: Mixail Naumov, Hakimxon A’lamxonov, Bunyod Isroilov, Mirkomil Lokayev, Firdavs Abdusalimov, Nurbek Safarov, Iskandar Xolmirzayev, Nodir Mavlonov, Nuriddin Hasanov, Amirjon Safarov, Abdumalik Abdullayev.

Ikkinchi bo‘limdan maydonga tushganlar: Rustam Toshturdiyev, Komil Sharofutdinov, Temur Fayzullayev, Jonibek Ko‘chimov, Asomiddin Mamatov, Ubaydullo Nabiyev, Sardor Rasulov, Dilmurod Qodirov.

Eslatib o‘tamiz, «Dinamo» jamoasi navbatdagi uchrashuvni 9 fevral kuni Navoiyning «Qizilqum» klubiga qarshi o‘tkazadi.