Angliya Premyer Ligasi 24-turidan o‘rin olgan «Manchester Yunayted»ga qarshi o‘yinda 0:3 hisobida mag‘lubiyatga uchragan amaldagi chempion «Lester» Premyer Ligada yangi kalendar yilining dastlabki besh o‘yinida gol urolmagan ilk jamoaga aylandi. Afsuski bu «tulkilar»ning natijalari orasidagi yagona yoqimsiz rekord emas.

Angliya Premyer Ligasi tashkil etilishidan oldin, Birinchi divizion musobaqasi doirasida «Tottenhem» ham 1986 yilning dastlabki besh o‘yinida raqiblari darvozasini ishg‘ol eta olmagan.

«Tulkilar» esa bu rekorddan tashqari Angliyaning eng yuqori to‘rt futbol divizionida 2017 yilda gol urmagan yagona jamoa bo‘lib turibdi. O‘tgan mavsumning shu davrida 68 ta gol urib ulgurgan Klaudio Raneri shogirdlari ushbu mavsumda o‘tkazgan 24 o‘yinida bor-yo‘g‘i 24 ta gol urishga erishgan.

O‘tgan mavsumda 24 ta gol urib Premyer-Liga to‘purari bo‘lgan hujumchi Jeymi Vardi esa ushbu mavsumda 21 o‘yinda 5 ta gol bilan cheklangan bo‘lsa, 2015/2016 yilgi mavsumda 17 ta gol urgan Afrikaning 2016 yildagi eng yaxshi futbolchisi Riyod Mahrez bu safar 22 o‘yinda 3 ta gol urishga erishgan xolos.

Aftidan Chempionlar Ligasidagi ishtiroki tufayli qo‘shilgan bosimni ko‘tara olmayotgan jamoa Premyer Ligada 24-turdan keyin 21 ochko to‘plab 16-o‘rinni egallab turibdi. 15-o‘rindagi «Midlsbro» va 17-o‘rindagi «Suonsi» «Lester» bilan bir xil ochko to‘plagan bo‘lsa, xavfli zonadagi «Xall Siti» 20, «Kristal Pelas» va «Sanderlend» esa 19 ochkodan to‘plagan.

Ko‘rinib turibdiki, «tulkilar»ning hozirgi o‘rni xavfli zona ostonasida joylashgan va jamoa shu tariqa o‘ynashda davom etsa chempionlikni qo‘lga kiritgandan keyingi mavsumdayoq Premyer Ligani tark etgan ilk jamoaga aylanishi ham hech gap emas. O‘tgan mavsumdagi ajoyib o‘yinlari bilan ko‘pchilikning mehrini qozongan «Lester» bunday holatga tushishini hech kim istamasa kerak.