"Liverpul" 10ta o‘yindan iborat g‘alabasiz o‘yinlar seriyasiga chek qo‘ydi. Mersisaydliklar Premyer-liganing 25-turi doirasida bo‘lib o‘tgan markaziy bahsda "Tottenxem"ni mag‘lub etishga muvaffaq bo‘ldi.

Bahsning 16-daqiqasida Veynaldumning uzatmasidan keyin Sadyo Mane darvozabon bilan birga-bir vaziyatga chiqib ketdi va darvozani ishg‘ol qildi. Oradan 2 daqiqa o‘tar-o‘tmas afrikalik futbolchining o‘zi londonliklar darvozasiga ikkinchi to‘pni yo‘lladi. Mane raqib jarima maydonchasi yaqinida himoyachidan to‘pni olib qo‘yib, jamoasining xavfli hujumiga asos soldi. Darvoza tomon berilgan 2ta zarbani himoyachi va darvozabon qaytardi. Mane tomonidan berilgan uchinchi zarba to‘rga borib tushdi.

Oradan ko‘p o‘tmasdan Sadyoda yana bir imkoniyat yuzaga keldi, biroq uning yakkama-yakka vaziyatda bergan zarbasini Ugo Lyoris qaytarishga muvaffaq bo‘ldi.

Ikkinchi bo‘limda esa xavfli vaziyatlar soni birinchi 45 daqiqalikka nisbatan kamroq yuzaga keltirildi.

Shu tariqa, Klopp shogirdlari APLda 2-o‘rinda borayotgan "Tottenxem" ustidan muhim g‘alabani qo‘lga kiritib, jadvalda 5-o‘ringa ko‘tarilib olishdi.

APL, 25-tur
Liverpul – Tottenxem 2:0 (2:0)
Gollar: 1:0 – 16 Mane, 2:0 – 18 Mane.
Liverpul – Minyole, Milner, Matip, Klayn, Koutinyo (Djan, 77), Lallana, Firmino, Veynaldum, Mane (Aleksander-Arnold, 90), Leyva (Klavan, 82), Xenderson.
Tottenxem – Lyoris, Alderveyreld, Devis, Uoker, Eriksen (Uinks, 68), Vanyama, Dembele (Sissoko, 77), Dayer, Alli, Son Xeung Min (YAnssen, 82), Keyn.
Ogohlantirishlar: Son Xeung Min (28), Xenderson (53), Matip (56), Keyn (67), Milner (68), Uinks (71), Dayer (78), Alderveyreld (83).