AQSHning Kaliforniya shtati, Temekula shahridagi «Pechanga Resort & Casino» arenasida hamyurtimiz Sanjar Rahmonov o‘zining navbatdagi jangini o‘tkazdi.

Taniqli bokschi Floyd Meyvezerga qarashli promouterlik kompaniyasida faoliyat yuritayotgan bokschimiz aslida bugun Endryu Tabitiga qarshi jang o‘tkazishi rejalashtirilgan edi. Biroq Endryu o‘z rejalariga o‘zgartirish kiritgani sabab, Sanjar boshqa raqibga qarshi jang o‘tkazdi.

Sakkiz raundga mo‘ljallangan jangda Sanjar Xose Maruffoga qarshi ringga ko‘tarildi. 25 yoshli meksikalik bokschi shu paytga qadar 18ta jang o‘tkazib, 10ta g‘alaba, 6 mag‘lubiyat va 2ta duranga erishgan edi. Rahmonov esa 7ta jang o‘tkazishga ulgurgan va 6ta g‘alaba, bir duranga imzo qo‘ygan.

Jang davomida ikki bokschi muddatidan avval jangni yakunlay olmadi va g‘olib nomi to‘plangan ochkolarga ko‘ra ma’lum bo‘ldi. Unda Sanjar Rahmonovning qo‘li baland keldi. Shu tariqa bokschimiz o‘z faoliyatdagi 7-g‘alabaga erishdi.