Osiyo chempionlar ligasining 2-turi doirasida "Lokomotiv" o‘z maydonida BAAning "Al-Ahli" klubini qabul qildi va o‘z hisobiga 3 ochko yozib qo‘yishga muvaffaq bo‘ldi.

E’tiborli tomoni, temiryo‘lchilar to‘pni o‘yinga kiritishdi va dastlabki hujumni gol bilan yakunlashdi. Kapadze chap qanotdan oldinga o‘tayotgan Bikmayevni to‘p bilan ta’minladi. Maratning uzatmasini Quttiboyev bosh bilan darvozaga joylab qo‘ydi. Bu vaqtda bahsning endi 20-soniyasi o‘tib borayotgandi.

Shundan keyin to‘p nazorati to‘laligacha BAAliklar tomoniga o‘tgan bo‘lsa, "Lokomotiv" asosan jamoa bo‘lib himoyalandi. Dastlabki turda xatoga yo‘l qo‘ygan Ignatiy Nesterov bu safar baxato harakat qilib, bir nechta vaziyatlarda jamoasini xavfli vazyaitlarda qutqardi.

Ikkinchi bo‘limning 57-daqiqasida omad yana mezbonlarga kulib boqdi. Olis masofadan yetkazilgan uzatmani qaytarishda himoyachi unchalik muvaffaqiyatli harakat qilmadi. Quttiboyev Bikmayevni darvozabon bilan yakkama-yakka vaziyatga chiqarib yubordi va hujumchimiz bu imkoniyatdan juda samarali foydalandi. 2:0.

O‘yinning so‘nggi daqiqalarida "Al-Ahli" bitta javob to‘pini kiritishi mumkin edi. Biroq Diopning zarbasidan keyin to‘p ustunga tegib, yon tomonga ketdi.

Ushbu g‘alabadan keyin "Lokomotiv" o‘z ochkolarini 3taga yetkazib oldi va to‘plar nisbatiga bo‘yicha guruh peshqadami bo‘lib oldi.

OCHL, "A" guruhi, 2-tur. 16:00
"LOKOMOTIV" (O‘zbekiston) - "AL-AHLI" (BAA) - 2:0 (1:0)
Gollar: Salamat Quttiboyev (1), Marat Bikmayev (57)
"Lokomotiv": 1.Ignatiy Nesterov, 5.Kaxi Maxaradze, 8.Salamat Quttiboyev, 10.Marat Bikmayev, 15.Sardor Mirzayev, 18.Temur Kapadze, 20.Islom To‘xtaxo‘jayev, 28.SHuhrat Muhammadiyev, 33.Oleg Zoteev, 42.Muhammad Kone, 99.Jaloliddin Masharipov
Zaxira: 12.Ma’mur Ikromov, 4.Boburbek Yo‘ldoshev, 7.Gnoxere Krizo, 11.Sadriddin Abdullayev, 17.Salim Mustafoyev, 29.Quvondiq Ro‘ziyev, 37.SHerzod Fayziyev
"Al Ahli": 55.Majid Nosir, 2.Salmin Xamis, 3.Asamoa Gyan, 4.Habib al-Fardan, 5.Volid Abbos, 10.Everton Ribeyro, 13.Xamis Ismoil, 57.Muhammad Sebil, 62.Abdulaziz Sanqur, 88.Majid Hassan, 99.Makete Diop.
Zaxira: 33.Saif Abdulla, 7.Ismoil Hammadiy, 20.Said Ahmad Abdulla, 24.Muhammad Jobir al-Hammadiy, 26.Abdulaziz Haykal, 70.Volid Husayin, 92.Said Jassim Hassan
Bosh hakam: Fu Ming (Xitoy)