"PSJ" bosh murabbiyi Unai Emeri YECHL 1/8 finalida "Barselona"ga qarshi javob uchrashuvi oldidan fikrlari bilan o‘rtoqlashdi.

Parijliklar birinchi uchrashuvda 4:0 hisobida g‘alaba qozongan edilar.

"Barselona" hozir qanday o‘yin sxemasini qo‘llamasin, men uni hamon o‘zgacha o‘yinchilarga ega buyuk klub deb hisoblayman. "Barsa"da taktik sxemalar zaxirasi katta, bunda u o‘zgarishlar qilmasligi ham mumkin. Birinchi o‘yinda biz aynan shuni ko‘rdik. Bundan tashqari, "Barselona"ning istalgan raqibi uning futbolchilari individual o‘yinda ustun ekanliklarini unutmasligi kerak.

Bizning ruhiy tayyorgarligimiz yuqori bo‘lishi kerak. Futbolchilarim har bir yakkakurashda bor kuchi bilan harakat qilishi lozim. Keyin raqiblarni ham ishlashga majbur qilishimiz kerak.

Faoliyatim davomida shuni bildimki, raqibga har doim hurmat bilan munosabatda bo‘lish kerak. Bu fikrlarni shogirdlarim bilan bo‘lishaman. Biz o‘zimizga ishonamiz va shu bilan birga "Barselona"ni chuqur hurmat qilamiz. Biz buyuk jamoa bilan uning afsonaviy stadionida o‘ynaymiz. Biz bu yerda qanday qorishmadan tuzilganimizni ko‘rsatishimiz kerak", - deydi Emeri.