Bugun Yevropa ligasining nimchorakfinalidan o‘rin olgan "Manchester Yunayted" – "Rostov" o‘yini o‘tkaziladi.
16 mart 2017-yil. Manchester.“Old Trafford” stadioni.
“Manchester Yunayted” - “Rostov”
Hakam: Gediminas Majeyka (Litva)
Birinchi o‘yin: 1-1
Manchester Yunayted jamoasi mazkur bahsga o‘z yelkasida Angliya Kubogidagi mag‘lubiyat yuki bilan tashrif buyurmoqda. Ushbu mag‘lubiyatdan so‘ng Joze Mourinyo shogirdlarida bu mavsum qo‘lga kiritilishi mumkin bo‘lgan faqat bitta Yevropa Ligasi kubogi qoldi. Aslida mankunyanliklar mazkur sovrin ishqida yonayotganlari yo‘q lekin keyingi mavsum YECHLda ishtirok etish uchun bu sovrin ularga kerak. Ayni shu sabab bugun ular chorak finalga chiqish uchun bor imkoniyatlarini ishga solishadi. To‘g‘ri kadrlar borasida jiddiy muammolar bor. Runi va Marsyal jarohat olishgan. Lekin Ibrahimovich bugun maydonga tusha oladi. Unga berilgan diskvalifikasiya yevrokuboklarga ta’sir ko‘rsatmaydi. Ko‘plab mutaxassislar “Manchester Yunayted”ga YELning qizig‘i yo‘q deb fikr yuritishmoqda, lekin shonli tarixga ega bo‘lgan jamoa uchun “qaytish mavsumi” Liga Kubogi va Yevropa Ligasi Kubogi bilan boshlanshi ham yomon start bo‘lmasdi.
Rus klubi birinchi uchrashuvda o‘z raqibi bilan durrang qayd etib kichik bir mo‘’jiza yarata oldi. Lekin bugun Rostovga safar bahsi oson o‘tmasligi aniq. Sababi, bugun ularga Angliyaning eng nomdor jamoasi raqib bo‘lmoqda. Ustiga ustak bugun jamoa yetakchilari sariq kartochkalar me’yoridan ko‘payib ketgani sabab o‘z jamolariga yordam bera olishmaydi. Ular jamoa sardori Gatskan va himoyachi Kalachyov. Bugungi bahs qanday yakunlanishidan qat’iy nazar bu mavsumni “Rostov” uchun omadli o‘tdi deyish mumkin. YECHLdagi g‘alabalar va albatta, kimsan “Bavariya”ning taslim etilishi nafaqat mazkur jamoaning balki butun rus futbol olamining yodidan uzoq muddatgacha ko‘tarilmasligi aniq. Bugungi uchrashuvga mankunyanliklar eng optimal holatda yetib kelmayotganini inobatga olsak bu rus klubiga biroz imkon yaratishi mumkin.
