"Navbahor" - "Xorazm" (5:0) o‘yinidan so‘ng, bellashuvda urilgan gollarga mualliflik qilgan Ro‘zimboy Ahmedov va Ravshan Xursanov o‘z taassurotlari bilan o‘rtoqlashdi.
"O‘yin kutilganidek og‘ir kechdi. Jamoamiz murabbiylarning bergan ko‘rsatmalarini a’lo darajada bajardi. Ko‘rib turganingizdek bugun yaxshi natija qayd etdik.
Mazkur uchrashuvga jiddiy tayyorgarlik ko‘rilgandi. Zero raqibni ham kuchsiz deb bo‘lmaydi. Ushbu o‘yinda erishgan natijamizni keyingi bellashuvlarda ham takrorlashga harakat qilamiz. Debyutim haqida to‘xtaladigan bo‘lsam, birinchi golimni ilk o‘yindayoq urishimda jamoadosh akalarim va murabbiylarimning xissasi beqiyos.
Golim bilan "Navbahor" muxlislarini xursand qildim deb umid qilaman. Chempionatimizning navbatdagi uchrashuvlarida ham "lochinlar" ishqibozlarini chiroyli gollarim bilan shod qilishga harakat qilaman", - deydi Xursanov.
"Bugungi o‘yin qiyin bo‘ldi. Ayniqsa birinchi taym og‘irroq o‘tdi desam mubolag‘a bo‘lmaydi. Dastlabki bo‘limda bir nechta vaziyatlardan unumli foydalana olmadik.
Xudoga shukur, uchrashuvning ikkinchi yarmida bor kuchimiz bilan harakat qilib, to‘rtta gol urdik. Buning uchun bizni qo‘llab-quvvatlab turgan muxlislarimizga ham raxmat aytaman.
Ushbu bellashuv "Dinamo"ga qarshi o‘yin oldidan tayyorgarlik bo‘ldi. Xudo xohlasa Samarqanddan ijobiy natija bilan qaytishga qo‘limizdan kelgancha haraqat qilamiz", - dedi Ahmedov.
