«Navbahor» Oliy liga 4-tur o‘yinlari doirasida Samarqandda “Dinamo”ga qarshi o‘ynadi.
Uchta turda 100 foizli natijani namoyish etib, musobaqa jadvalida karvonboshilik qilib kelayotgan samarqandliklarni “Navbahor” taslim etishga muvaffaq bo‘ldi.
Birinchi bo‘lim “lochinlar” ustunligida o‘tdi deyish mumkin. Chunki qanotlardan tashkil etilgan hujumlar va darvozaga yo‘llangan zarbalar bo‘yicha Mo‘minjonov shogirdlari raqibdan ustun kelishdi. 15- daqiqaga kelib Oybek Qilichev hisobni ochishga muvaffaq bo‘ldi. Markazga yaqin joyda to‘pni qabul qilib olgan Qilichev darvozabon bilan yakkama-yakka vaziyatga chiqdi va Naumovni dog‘da qoldirdi.
Goldan so‘ng “Dinamo” vaziyatni o‘nglash maqsadida bir nechta xavfli hujumlarni tashkil qildi, ammo himoyachilar bexato harakat qilishdi va gol o‘tkazilishiga yo‘l qo‘yishmadi. Bo‘lim oxirigacha ushbu hisob saqlanib qoldi.
Bellashuvning ikkinchi yarmi esa teng kurashlarda o‘tdi. “Navbahorchilar” asosan qarshi hujumni poylab, raqib darvozasi oldida xavf yaratishdi. “Dinamo” ham o‘z maydonida ochko yo‘qotmaslik maqsadida ko‘p hujumlar tashkil qildi, ammo raqibning zarbalari noaniq chiqaverdi.
Uchrashuv oxirida mehmonlar ikkinchi golni ham urishga yaqin kelishgandi. Qarshi hujumda Dilshod Jabborov darvozabon bilan deyarli yakkama-yakka vaziyatga chiqdi, ammo Naumov mahorat ko‘rsatdi. Qolgan daqiqalarda 0:1 hisobini o‘zgarmay qoldi.
Shu tariqa “Navbahor” mavsumda mag‘lubiyat nimaligini bilmay kelgan “Dinamo”ni safarda taslim etdi.
Oliy liga, 4-tur
“Dinamo” – “Navbahor” 0:1 (0:1). 31 mart. Samarqand. “Dinamo” o‘yingohi.
Gol: O. Qilichev (15).
Hakamlar: V. Seytlin, A. Kalinin, B. Qosimov, F. Norsafarov.
Nazoratchi – SH. Jumayev.
“Dinamo”: 1. Mixail Naumov, 2. Mirkomil Lokayev, 3. Bunyod Isroilov, 8. Jasur Azimov, 9. Sardor Sulaymonov (20. Amirjon Safarov, 64), 10. Javohir Qahrmonov, 14. Radu Rogak, 15. Shoxruh Xolmatov (11. Abdumalik Abdullayev, 50), 18. Damir Nizanov (6. Akmal Bozorov, 83), 19. Orif Mamajanov, 22. Abdujamol Isroilov.
“Navbahor”: 30. Asilbek Amanov, 2. Alisher Samatov (20. Alisher Mirzayev, 67), 4. Abbos Otaxonov, 5. G‘iyos Komilov, 7. Oybek Qilichev (40. Darko Stanoyevich, 75), 9. Dilshod Jabborov, 19. Mirzohid G‘ofurov, 21. A’zam Aliyev (22. Ro‘zimboy Ahmedov, 52), 32. Jahongir Mehmonov, 77. Azizbek Turg‘unboyev, 84. Nemanya Yovanovich.
Ogohlantirish: SH. Xolmatov (40), J. Qahramonov (90) - G‘. Komilov (24), M. G‘ofurov (40), J. Mehmonov (54), N. Yovanovich (81).
Chetlatish: O. Qilichev (76).
