Boks bo‘yicha O‘zbekiston terma jamoasi 3-9 aprel kunlari Tailandning Bangkok shahrida bo‘lib o‘tgan “Qirol kubogi” xalqaro turnirida ishtirok etib qaytdi. Musobaqada ishtirok etgan o‘zbekistonlik barcha bokschilar sovrindor bo‘lishga muvaffaq bo‘lishdi.

11 aprel kuni Toshkentga qaytib kelgan terma jamoa murabbiyi Rahmatjon Ro‘ziohunov “Qirol kubogi” turniri haqida o‘z fikrlari bildirib o‘tdi.

"30 aprel kuni Toshkent shahrida Osiyo chempionati start oladi. Bu musobaqa biz uchun juda muhim bo‘lib, unda shu yil Gamburg shahrida bo‘lib o‘tadigan Jahon chempionati uchun lisenziyalar o‘ynaladi. Osiyo chempionati oldidan o‘z vazn toifasida yetakchi bo‘lgan bokschilarimizni so‘ngi sinovdan o‘tkazib olish maqsadida “Qirol kubogi”da ishtirok etdik. O‘ylaymanki, ishtirokimiz muvaffaqiyatli bo‘ldi. Musobaqada ishtirok etgan 18 ta mamlakat terma jaomalaridan hech biri to‘liq tarkibda sovrindor bo‘lishga erishmadi. Biz esa buni uddaladik. Natijalar bundan ham yaxshiroq bo‘lishi mumkin edik. Biroq, biz – murabbiylar Hasanboy Do‘smatov va Shahram G‘iyosovni finalga qo‘ymaslikka qaror qildik. Ular turnirda o‘zlarini ko‘rsatib bo‘lishgandi. Bunda, kutilmagan jarohatlardan qochish ham ko‘zda tutildi. Endilikda, Toshkent viloyatidagi “Yangiobod” o‘quv mashg‘ulot bazasida Osiyo chempionatiga tayyorgarlik ko‘rishni davom ettiramiz" - dedi Ro‘ziohunov.